ഇന്ത്യയിൽ മാസങ്ങൾക്കു മുൻപേ ബിഎഫ്.7 കണ്ടെത്തിയിരുന്നു; പക്ഷേ കോവിഡ് കേസുകൾ കൂടിയില്ല: INSACOG അം​ഗം ഡോ.സൗമിത്ര ദാസ്

ഇന്ത്യയിലെ ജനസംഖ്യയുടെ ഭൂരിഭാഗവും രണ്ട് ഡോസ് വാക്സിൻ എടുത്തവരാണെന്നും അവർ ഗുരുതരമായ ഇത്തരം വകഭേദങ്ങളിൽ നിന്ന് സംരക്ഷിക്കപ്പെടുന്നു എന്നു കാര്യവും ഡോ.ദാസ് ചൂണ്ടിക്കാട്ടി. ”നിരവധി കോവിഡ് തരം​​ഗങ്ങളോടു പോരാടി ഇന്ത്യക്കാർ പ്രതിരോധശേഷി നേടിയിട്ടുണ്ട്. വളരെ ചുരുങ്ങിയ സമയത്തിനുള്ളിൽ ഭൂരിഭാഗം പേരെയും ബാധിച്ച ഒമിക്രോണിലൂടെ നമ്മൾ പലതും പഠിച്ചു”, അദ്ദേഹം കൂട്ടിച്ചേർത്തു. രണ്ടാമത്തെയും മൂന്നാമത്തെയും തരംഗങ്ങളിൽ, നിരവധി ആളുകളെ കോവിഡ് ബാധിക്കുകയും നാം സ്വാഭാവിക പ്രതിരോധശേഷി നേടുകയും ചെയ്തു, ഇത് വാക്സിൻ നൽകുന്ന പ്രതിരോധശേഷിയേക്കാൾ മികച്ചതാണെന്നും ഡോ. ദാസ് പറഞ്ഞു. എന്നാൽ ചൈനയിലെ കാര്യം അതല്ലെന്നും അദ്ദേഹം ചൂണ്ടിക്കാട്ടി. ”സീറോ-കോവിഡ് നയവും ലോക്ക്ഡൗണുകളും കാരണം ചൈനയിലെ ജനങ്ങൾക്ക് ഈ പ്രതിരോധശേഷി ഉണ്ടാകില്ല”, അദ്ദേഹം കൂട്ടിച്ചേർത്തു.

ഇപ്പോൾ കോവിഡ് കൂടുന്നതിനു പിന്നിൽ മറ്റ് ശാസ്ത്രീയ കാരണങ്ങളൊന്നുമില്ല. 2020-ൽ യുകെയിൽ കണ്ടെത്തിയ ഉപവിഭാ​ഗം പുതുവത്സര-ക്രിസ്‌മസ് സമയത്ത് ഒരു രാജ്യത്തു നിന്ന് മറ്റൊന്നിലേക്ക് വ്യാപിക്കാൻ തുടങ്ങിയിരുന്നു. സമാനമായ പ്രവണതയാണ് ഇപ്പോൾ സംഭവിക്കുന്നതെന്നും ഡോ. ദാസ് പറഞ്ഞു. 2021 ൽ, ഇതേ സമയത്താണ് ഒമിക്രോൺ വ്യാപിക്കാൻ തുടങ്ങിയത് എന്ന കാര്യവും അദ്ദേഹം ചൂണ്ടിക്കാട്ടി. കഴിയുന്നത്ര സാമ്പിളുകൾ പരിശോധിക്കാനാണ് INSACOG ശ്രമിക്കുന്നത് എന്നും ഡോ.സൗമിത്ര ദാസ് ന്യൂസ് 18 നോട് പറഞ്ഞു.