പെരുന്നാൾ നമസ്കാരം വീടുകളിൽ; ആലിംഗനവും ഹസ്തദാനവും വേണ്ട; നിര്‍ദേശങ്ങളുമായി കർണാടകയിലെ മുസ്ലീം സംഘടനകൾ

കൂട്ടംകൂടൽ ഒഴിവാക്കണമെന്ന കർശന നിർദേശം നിലവിലുള്ളതിനാൽ പെരുന്നാൾ നമസ്കാരം വീടുകളിൽ തന്നെയാക്കണമെന്നാണ് മുഖ്യമായും അറിയിച്ചിരിക്കുന്നത്. ഇതിനായി പള്ളികളില്‍ എത്തുന്നത് ഒഴിവാക്കണം. അതുപോലെ തന്നെ ഒത്തു ചേരലും ബന്ധുക്കളുടെയും സുഹൃത്തുക്കളുടെയും വീടുകളിലെ സന്ദർശനവും,പൊതുവായ അഭിവാദ്യ രീതികളായ ആലിംഗനവും ഹസ്തദാനവും ഒഴിവാക്കണമെന്നും നിർദേശിച്ചിട്ടുണ്ട്.

"നിലവിലെ മഹാമാരിയുടെ ഘട്ടത്തിൽ ഏതെങ്കിലും തരത്തിലും കൂട്ടായ്മകൾ നടത്തുക എന്നത് അസംഭവ്യമാണ്.. അതുകൊണ്ട് തന്നെ ഈദ് ഗാഹുകൾ ഉണ്ടായിരിക്കുന്നതല്ല.. വൈറസ് വ്യാപന സാധ്യതയുള്ളതിനാൽ ആലിംഗനവും ഹസ്തദാനവും ഒഴിവാക്കാൻ ഞങ്ങൾ മുസ്ലീം സഹോദരങ്ങളോട് അഭ്യർഥിക്കുകയാണ്.. അപകടകാരിയായ ഈ വൈറസിനെ ഒഴിവാക്കാൻ പുറത്തിറങ്ങുന്നതും കഴിവതും ഒഴിവാക്കണം.. വീടുകളിൽ തന്നെ കഴിഞ്ഞ് നിങ്ങളെയും മറ്റുള്ളവരെയും സുരക്ഷിതരാക്കുക" .. ബംഗളൂരു ജമാ മസ്ജിദ് ഇമാം മഖ്സൂദ് ഇമ്രാൻ അറിയിച്ചു. വിവിധ മുസ്ലീം സംഘടനകളുമായി നടത്തിയ യോഗത്തിന് ശേഷമാണ് ഇത്തരം നിര്‍ദേശങ്ങൾ മുന്നോട്ട് വച്ചത്.

'ഇക്കാര്യത്തിൽ പലർക്കും പല അഭിപ്രായങ്ങളുമുണ്ടാകും. 'ഗതാഗതം പുനഃസ്ഥാപിച്ചു, കടകൾ തുറന്നു.. മദ്യശാലകൾ വരെ തുറന്നു... പിന്നെ എന്തുകൊണ്ട് പള്ളിയില്‍ ഒത്തുചേർന്നു കൂടാ എന്ന്? ഞങ്ങൾ ഞങ്ങളുടെ വിഭാഗത്തിൽപ്പെട്ട ചില ആരോഗ്യവിദഗ്ധരുമായും ഉലമാക്കളുമായും ചില എംപി-എംഎൽഎമാരുമായും സംസാരിച്ചിരുന്നു.. അതിനു ശേഷമാണ് മസ്ജിദുകളിലേക്ക് വരണ്ട എന്നും പെരുന്നാൾ നമസ്കാരം വീടുകളിൽ മതിയെന്നുമുള്ള തീരുമാനത്തിലെത്തിയത്' ഇമ്രാൻ വ്യക്തമാക്കി.

ഹസ്തദാനം, ആലിംഗനം എന്നിവ ഒഴിവാക്കുക

കൂട്ടം കൂടുന്നത് ഒഴിവാക്കുക. നമസ്കാരം വീടുകളിൽ നിർവഹിക്കുക. പള്ളികളിലെ ആരാധന ചടങ്ങിൽ അഞ്ച് പേരിൽ കൂടാൻ പാടില്ല

പ്രാർഥനകൾ സ്വീകരിക്കപ്പെടുന്ന സമയമാണിത് അതുകൊണ്ട് തന്നെ പ്രാര്‍ഥനകളിൽ മുഴുകുക