കോവിഡ് വാക്സിൻ നിർമാണത്തിനുള്ള അസംസ്കൃത ഉത്പന്നങ്ങളുടെ ലഭ്യത ഉറപ്പാക്കും; ഇന്ത്യക്ക് അമേരിക്കയുടെ ഉറപ്പ്

ന്യൂഡൽഹി: കോവിഡ് വ്യാപനം ശക്തമായിരിക്കെ അമേരിക്കൻ ദേശീയ സുരക്ഷാ ഉപദേഷ്ടാവ് ജേക്ക് സുള്ളിവൻ ഇന്ത്യൻ ദേശീയ സുരക്ഷാ ഉപദേഷ്ടാവ് അജിത് ഡോവലുമായി ഫോണിൽ സംസാരിച്ചു. ലോകത്ത് ഏറ്റവും കോവിഡ് രോഗികൾ ഉള്ള രണ്ട് രാജ്യങ്ങളെന്ന നിലയിൽ ഇന്ത്യക്ക് ഐക്യദാർഢ്യം പ്രഖ്യാപിക്കുന്നതായി സുള്ളിവൻ അറിയിച്ചു. സ്മാൾപോക്സ്, പോളിയോ, എച്ച്ഐവി എന്നീ രോഗങ്ങളെ പ്രതിരോധിക്കുന്നതിന് ഇരു രാജ്യങ്ങളും തമ്മിൽ ഏഴു പതിറ്റാണ്ട് നീണ്ട ആരോഗ്യ പങ്കാളിത്തമാണുള്ളത്. കോവിഡ് 19 എന്ന മഹാമാരിക്കെതിരെയും ഇരുരാജ്യങ്ങളും ചേർന്ന് പോരാടും. അമേരിക്കയിൽ രോഗം പടർന്നുപിടിച്ചപ്പോള്‍ ഇന്ത്യ സഹായം ചെയ്തിരുന്നു. അതുപോലെ ഇന്ത്യയെ സഹായിക്കാൻ അമേരിക്കയും പ്രതിജ്ഞാബദ്ധമാണെന്നും സുള്ളിവൻ അറിയിച്ചു.