മഞ്ഞുമ്മൽ ബോയ്സ് സംവിധായകനെതിരെ ലൈംഗികാതിക്രമത്തിന് കേസ്

2022-ലാണ് കേസിനാസ്പദമായ സംഭവം നടന്നത്. പരാതിക്കാരിയുടെ ഫ്ലാറ്റിലെത്തിയ സംവിധായകൻ മോശമായി പെരുമാറിയെന്നും ലൈംഗികാതിക്രമത്തിന് മുതിർന്നെന്നുമാണ് പൊലീസിന് നൽകിയിരിക്കുന്ന മൊഴി. ഭാരതീയ ന്യായ സംഹിതയിലെ (BNS) 74, 75 വകുപ്പുകൾ പ്രകാരമാണ് ചിദംബരത്തിനെതിരെ കേസെടുത്തിരിക്കുന്നത്. സ്ത്രീയുടെ അന്തസ്സിനെ ഹനിക്കുന്ന തരത്തിൽ പ്രവർത്തിക്കുക, ലൈംഗിക ചുവയോടെ സംസാരിക്കുകയോ പ്രവർത്തിക്കുകയോ ചെയ്യുക തുടങ്ങിയ കുറ്റങ്ങളാണ് ചുമത്തിയിട്ടുള്ളത്.

പരാതിയിൽ വിശദമായ അന്വേഷണം ആരംഭിച്ചതായി എറണാകുളം സൗത്ത് പൊലീസ് അറിയിച്ചു. സംഭവത്തിൽ ചിദംബരത്തെ ഉടൻ ചോദ്യം ചെയ്യും. അന്വേഷണത്തിന്റെ പുരോഗതി അനുസരിച്ച് അറസ്റ്റ് ഉൾപ്പെടെയുള്ള കർശന നടപടികളിലേക്ക് കടക്കുമെന്നും പൊലീസ് വ്യക്തമാക്കിയിട്ടുണ്ട്.