ആലപ്പുഴ ക്ഷേത്രോത്സവത്തിനിടെ ഗുണ്ടകള്‍ ഏറ്റുമുട്ടി; എയർ പിസ്റ്റൾ ഉപയോഗിച്ച് വെടിവെപ്പ്, 10 പേർക്ക് പരിക്ക്

പുളിക്കീഴ്, പല്ലന ഭാഗങ്ങളിൽ നിന്നുള്ള ഗുണ്ടാസംഘങ്ങളാണ് ഉത്സവപ്പറമ്പിൽ ഏറ്റുമുട്ടിയത്. വിഷ്ണു സജിൻ എന്നയാളുടെ നേതൃത്വത്തിലുള്ള സംഘമാണ് എയർ പിസ്റ്റൾ ഉപയോഗിച്ച് വെടിയുതിർത്തത്. തുടർന്നുണ്ടായ സംഘർഷത്തിനിടെ എതിർസംഘം ഈ തോക്ക് പിടിച്ചെടുത്ത് പോലീസിന് കൈമാറുകയായിരുന്നു. രാഷ്ട്രീയ സ്വാധീനം ഉപയോഗിച്ച് മുൻപും സമാനമായ കേസുകൾ ഒത്തുതീർപ്പാക്കിയതാണ് പ്രതികൾക്ക് വീണ്ടും അക്രമം നടത്താൻ കരുത്താകുന്നതെന്ന് നാട്ടുകാർ ആരോപിക്കുന്നു. പരിക്കേറ്റവർ പരുമലയിലെ സ്വകാര്യ ആശുപത്രിയിൽ പോലീസ് നിരീക്ഷണത്തിൽ ചികിത്സയിലാണ്. സംഭവത്തിൽ തൃക്കുന്നപ്പുഴ പോലീസ് കേസെടുത്ത് അന്വേഷണം ആരംഭിച്ചു.