ഗംഗേശാനന്ദയ്ക്കെതിരായ ലൈംഗിക പീഡനക്കേസ് റദ്ദാക്കി; കള്ളക്കേസിനു പിന്നിൽ മുൻ ഡിജിപി എന്ന് സ്വാമി

കോട്ടയം നെടുംകുന്നത്തെ ഒരു സാധാരണ കുടുംബത്തിൽ ആണ് ഹരികുമാറിന്റെ ജനനം, പിന്നീട് ചായക്കടക്കാരനിൽ നിന്ന് ആത്മീയ വഴി തേടിയുള്ള യാത്ര.. അങ്ങനെ ഒരു പൂർവകാല കഥ പറയാനുണ്ട് ശ്രീഹരി എന്ന സ്വാമി ഗംഗേശാനന്ദയ്ക്ക്. തിരുവനന്തപുരം കണ്ണമ്മൂലയിൽ ചട്ടമ്പി സ്വാമികളുടെ സ്ഥലം സംരക്ഷിക്കാൻ നടത്തിയ സമരപോരാട്ടങ്ങൾക്ക് നേതൃത്വം നൽകിയതോടെ ഹൈന്ദവ സംഘടനകളുടെ പ്രിയങ്കരനായി. പക്ഷേ പിന്നീട് ഒരൊറ്റ ദിവസം കൊണ്ട് സ്വാമി ഗംഗേശാനന്ദ വിവാദനായകനായി മാറുകയായിരുന്നു. ജനനേന്ദ്രീയം മുറിച്ച സംഭവം, ലൈംഗീക ആരോപണം അങ്ങനെ കേസും പ്രശ്നങ്ങളും നിയമനടപടികളും നേരിട്ട ഒൻപത് വർഷം. 2017ൽ ഗംഗേശാനന്ദയ്ക്കെതിരെ രജിസ്റ്റർ ചെയ്ത ലൈംഗികാതിക്രമക്കേസിൽ പല അട്ടിമറികളും മൊഴിമാറ്റവും കണ്ടതാണ്.

2017 മേയ് 19ന് പുലര്‍ച്ചെയാണ് തിരുവനന്തപുരം കണ്ണമ്മൂലയിലുള്ള വീട്ടില്‍ വച്ച് സ്വാമിയുടെ ജനനേന്ദ്രിയം ഛേദിച്ചത്. വീടിനു പുറത്തേക്ക് ഓടിയ പെണ്‍കുട്ടിയെ ഫ്‌ളൈയിങ് സ്‌ക്വാഡ് സ്റ്റേഷനില്‍ എത്തിക്കുകയായിരുന്നു. പെണ്‍കുട്ടിയുടെ മൊഴിയുടെ അടിസ്ഥാനത്തില്‍ സ്വാമിക്കെതിരെ ലൈംഗിക പീഡനത്തിനു കേസ് എടുത്തു. മജിസ്‌ട്രേറ്റിന് നല്‍കിയ രഹസ്യ മൊഴിയിലും പെണ്‍കുട്ടി ഇക്കാര്യം ആവര്‍ത്തിച്ചിരുന്നു. എന്നാല്‍ പിന്നീട് ഹൈക്കോടതിയില്‍ നല്‍കിയ സത്യവാങ്മൂലത്തില്‍ സ്വാമി ഒരിക്കലും തന്നെ പീഡിപ്പിച്ചിരുന്നില്ലെന്നു പെൺകുട്ടി വ്യക്തമാക്കി. സ്വയം ലിംഗഛേദം ചെയ്തതാണെന്നു സ്വാമി മൊഴി നൽകുകയും ചെയ്തു.