R Praggnanandhaa | മാഗ്നസ് കാൾസനെ തോൽപ്പിച്ച Grandmaster രമേഷ് ബാബു പ്രഗ്നാനന്ദ ആരാണ്? എന്താണ് ഈ പേര്?

ഫെബ്രുവരി 20 ഞായറാഴ്ച രാവിലെയോടെയായിരുന്നു ഇന്ത്യക്കാര്‍ക്ക് അഭിമാനമായ ഈ വാര്‍ത്ത പുറത്തുവന്നത്. എയര്‍തിങ്സ് മാസ്റ്റേഴ്സ് ഓണ്‍ലൈന്‍ റാപിഡ് ചെസ് ടൂര്‍ണമെന്റിന്റെ എട്ടാം റൗണ്ടില്‍ ലോക ഒന്നാം നമ്പര്‍ താരമായ നോര്‍വീജിയക്കാരന്‍ കാള്‍സണെതിരെ പ്രഗ്‌നാനന്ദ അട്ടിമറി വിജയം നേടുകയായിരുന്നു. കറുത്ത കരുക്കളുമായി കളിച്ച പ്രഗ്‌നാനന്ദ 39 നീക്കങ്ങള്‍ക്കൊടുവില്‍ 31കാരനായ കാള്‍സണെ അടിയറവ് പറയിക്കുകയായിരുന്നു. എട്ട് റൗണ്ട് പൂര്‍ത്തിയായ ഘട്ടത്തില്‍ ടൂര്‍ണമെന്റില്‍ 12ാം സ്ഥാനത്താണ് പ്രഗ്‌നാനന്ദ ഇപ്പോള്‍. രണ്ട് ജയവും രണ്ട് സമനിലയുമാണ് ടൂര്‍ണമെന്റിലെ ഇതുവരെയുള്ള നേട്ടം.

ചെന്നൈ സ്വദേശികളായ നാഗലക്ഷ്മിയുടെയും രമേഷ്ബാബുവിന്റെയും മകനായി 2005 ഓഗസ്റ്റ് 10നാണ് ആർ പ്രഗ്നാനന്ദയുടെ ജനനം. ഗ്രാന്‍ഡ് മാസ്റ്റര്‍ പട്ടം നേടിയ ലോകത്തെ തന്നെ ഏറ്റവും പ്രായം കുറഞ്ഞ അഞ്ചാമത്തെയാളാണ്. ആര്‍ ബി രമേശിന് കീഴില്‍ ചെസ് പരിശീലനം ആരംഭിച്ച പ്രഗ്‌നാനന്ദ, 2013ലെ വേള്‍ഡ് യൂത്ത് ചെസ് ചാമ്പ്യന്‍ഷിപ്പില്‍ ഏഴാം വയസില്‍, അണ്ടര്‍ 8 ടൈറ്റിലും 2015ല്‍ അണ്ടര്‍ 10 ടൈറ്റിലും നേടി.

പ്രഗ്നാനന്ദ സോഷ്യൽ മീഡിയയിൽ നിന്നും പൂർ‌ണമായും വിട്ടുനിൽക്കുകയാണ്. ഇഎസ്പിഎൻ ആണ് ഇക്കാര്യം റിപ്പോർട്ട് ചെയ്തത്. പരിശീലകന്‍ ആര്‍ ബി രമേശിന്റെ നിര്‍ദേശപ്രകാരം, മത്സരങ്ങളില്‍ സമ്മര്‍ദ്ദം കുറക്കുന്നതിനാണ് ഈ തീരുമാനം.

പ്രഗ്നാനന്ദ എന്ന് പേര് മാതാപിതാക്കളാണ് നിർദേശിച്ചത്. ഇരുവരും മഹാവിഷ്ണുവിന്റെ അവസാന അവതരമായ കൽക്കിയുടെ ആരാധകരാണ്. ഇരുവരും നിത്യേന സന്ദർശിക്കുന്ന ക്ഷേത്രത്തിലെ പൂജാരിമാരാണ് ഈ പേരിട്ടത്. '' ഈ പേരിന്റെ അർത്ഥം എന്താണെന്ന് ഞങ്ങൾക്ക് അറിയില്ല. പക്ഷേ ഈ പേര് കേൾക്കുമ്പോൾ ഒരു ജിജ്ഞാസ എല്ലാവരിലുമുണ്ടാകും''- പ്രഗ്നാന്ദയുടെ അച്ഛൻ ആർ രമേഷ് ബാബു പറഞ്ഞു.