ബ്രേക്കിനുശേഷം ദീപികയുടെ തിരിച്ചുവരവ് കൽക്കിയിലൂടെ; ഷെഡ്യൂൾ ഉടനെന്ന് നിർമാതാക്കൾ

മെറ്റേണിറ്റി ബ്രേക്കിന് ശേഷം ദീപിക അഭിനയിക്കുന്ന ആദ്യ ചിത്രമാകും കൽക്കിയുടെ രണ്ടാം ഭാഗം. ആദ്യ ഭാഗത്തെ പോലെ തന്നെ രണ്ടാം ഭാഗത്തിൻ്റെ ആഗോള റിലീസിനും നിർമ്മാതാക്കൾ പദ്ധതിയിട്ടിട്ടുണ്ട്. ആഗോളതലത്തിൽ 1000 കോടി കളക്ഷൻ സ്വന്തമാക്കിയ ചിത്രം കൂടിയായിരുന്നു കൽക്കിയുടെ ആദ്യ ഭാഗം. മെഗാ ബജറ്റിൽ ഒരുങ്ങുന്ന സയൻസ് ഫിക്ഷൻ ചിത്രത്തിൽ കമൽ ഹാസനാണ് പ്രധാന വില്ലൻ. 'കാശി, 'കോംപ്ലക്സ്', 'ശംഭാള' എന്നീ മൂന്ന് ലോകങ്ങള്‍ പശ്ചാത്തലമാകുന്ന ചിത്രത്തിൽ മഹാഭാരതകാലം മുതൽ എഡി 2898 വരെ നീണ്ടുനിൽക്കുന്ന കഥയാണ് ദൃശ്യാവിഷ്കരിച്ചിരിക്കുന്നത്. 'ഭൈരവ' എന്ന കഥാപാത്രത്തെയാണ് പ്രഭാസ് അവതരിപ്പിച്ചത്. അശ്വത്ഥാമാവായി അമിതാഭ് ബച്ചന്‍ എത്തിയ ചിത്രത്തില്‍ വിജയ് ദേവരകൊണ്ട, ദുൽഖർ സൽമാൻ എന്നിവർ അതിഥി വേഷങ്ങളില്‍ എത്തിയിരുന്നു.