'അന്ന് മമ്മൂട്ടിയുടെ അനുജൻ, ഇന്ന് ദുൽഖറിന്റെ ചേട്ടൻ': പോസ്റ്റുമായി മനോജ്‌ കെ ജയൻ

ദുൽഖർ സൽമാൻ നായകനായി എത്തുന്ന 'സല്യൂട്ട്' സിനിമയുടെ ചിത്രീകരണം കഴിഞ്ഞദിവസം പൂർത്തിയായിരുന്നു. ദുൽഖർ സൽമാനും സംവിധായകൻ റോഷൻ ആൻഡ്രൂസും ഒരുമിക്കുന്ന ആദ്യ ചിത്രമാണിത്. ഈ ചിത്രത്തിൽ ദുൽഖർ സൽമാന്റെ ചേട്ടന്റെ വേഷത്തിലാണ് മനോജ് കെ ജയൻ എത്തുന്നത്.

2005ൽ പുറത്തിറങ്ങിയ രാജമാണിക്യം എന്ന സിനിമയിൽ മമ്മൂട്ടിയുടെ അനുജനായി മനോജ് കെ ജയൻ വേഷമിട്ടിരുന്നു. എന്നാൽ, അന്ന് ഒരു തരത്തിലും ദുൽഖറിന്റെ ചേട്ടനായി ഒരു സിനിമയിൽ വേഷമിടുമെന്ന് ചിന്തിച്ചിരുന്നില്ലെന്ന് വ്യക്തമാക്കുകയാണ് മനോജ് കെ ജയൻ. ഇതൊരു അപൂർവ ഭാഗ്യമാണെന്നും മനോജ് കെ ജയൻ ഓർത്തെടുക്കുന്നു.

ദുൽഖർ എന്തൊരു സ്വീറ്റ് പേഴ്സണാണെന്നും തന്റെ കുറിപ്പിൽ അദ്ദേഹം പറയുന്നു. റോഷൻ ആൻഡ്രൂസിനെ ബ്രില്യന്റ് ഡയറക്ടർ എന്നാണ് വിശേഷിപ്പിച്ചിരിക്കുന്നത്. സിനിമിയിലെ വേഷത്തിൽ ദുൽഖറിന് ഒപ്പമുള്ള ചിത്രം പങ്കുവച്ചാണ് മനോജ് കെ ജയന്റെ കുറിപ്പ്.

വേഫെയറർ ഫിലിംസിന്റെ ബാനറിൽ ദുൽഖർ സൽമാൻ തന്നെയാണ് ചിത്രം നിർമ്മിക്കുന്നത്. ദുൽഖറും റോഷൻ ആൻഡ്രൂസും ഒരുമിക്കുന്ന ആദ്യ ചിത്രമാണിത്. ബോബി - സഞ്ജയ് ആണ് തിരക്കഥ. വേഫെയറർ ഫിലിംസിന്റെ ബാനറിൽ നിർമിക്കുന്ന അഞ്ചാമത്തെ ചിത്രം കൂടിയാണ് ഇത്.

ബോളിവുഡ് താരവും മോഡലുമായ ഡയാന പെന്റിയാണ് ചിത്രത്തിലെ നായിക. മനോജ് കെ ജയനെ കൂടാതെ അലൻസിയാർ, ബിനു പപ്പു, വിജയകുമാർ, ലക്ഷ്മി ഗോപാലസ്വാമി, സാനിയ ഇയ്യപ്പൻ തുടങ്ങിയവർ മറ്റു പ്രധാന വേഷങ്ങളിൽ ചിത്രത്തിൽ എത്തുന്നു.