Putham Pudhu Kaalai| അഞ്ച് പ്രിയ സംവിധായകർ, അഞ്ച് കഥ; ആമസോണിൽ 'പുത്തം പുതു കാലൈ' 

ഗൗതം മേനോൻ, സുഹാസിനി മണിരത്നം, രാജീവ് മേനോൻ, സുധ കെ പ്രസാദ് , കാർത്തിക് സുബ്ബരാജ് എന്നിവർ ചേർന്നാണ് സിനിമ ഒരുക്കുന്നത്.

വ്യത്യസ്തമായ അഞ്ച് പ്രണയകഥകളായിരിക്കും ചിത്രം പറയുന്നത്. കോവിഡ് മാനദണ്ഡങ്ങൾ പാലിച്ചായിരിക്കും സിനിമയുടെ ചിത്രീകരണമെന്ന് ആമസോൺ അറിയിച്ചു. കോവിഡ് പശ്ചാത്തലത്തിലുള്ള കഥകളായിരിക്കും ചിത്രത്തിലൂടെ സംവിധായകർ പറയുന്നത് എന്നാണ് സൂചന.

ഇളമൈ ഇദോ ഇദോ എന്ന ഹ്രസ്വചിത്രമാണ് സുധ കെ പ്രസാദ് പുത്തംപുതു കാലൈയിൽ സംവിധാനം ചെയ്യുന്നത്. ജയറാം, കാളിദാസ് ജയറാം, ഉർവശി, കല്യാണി പ്രിയദർശൻ എന്നിവരാണ് പ്രധാന വേഷത്തിൽ എത്തുന്നത്. സൂര്യ നായകനായ ഏറ്റവും പുതിയ ചിത്രം സുരാരൈ പോട്ര് ആണ് സുധ കൊങ്കാര( സുധ കെ പ്രസാദ്) സംവിധാനം ചെയ്ത ഏറ്റവും ഒടുവിലത്തെ ചിത്രം.

അവളും നാനും എന്ന ചിത്രമാണ് ഗൗതം മേനോൻ സംവിധാനം ചെയ്യുന്നത്. റിതു വർമ, എംഎസ് ഭാസ്കർ എന്നിവരാണ് പ്രധാന വേഷത്തിൽ എത്തുന്നത്.

റീയൂണിയൻ എന്ന പേരിലാണ് രാജീവ് മേനോൻ ചിത്രം തയ്യാറാക്കുന്നത്. ആൻഡ്രിയ ജെറിമിയ, ലീല സാംസൺ എന്നിവരാണ് പ്രധാന വേഷത്തിൽ എത്തുക. സുഹാസിനി സംവിധാനം ചെയ്യുന്ന ചിത്രത്തിൽ അനു ഹാസൻ, ശ്രുതി ഹാസൻ എന്നിവരാണ് പ്രധാനം വേഷം ചെയ്യുന്നത്. കോഫി എനിവൺ? എന്നാണ് ചിത്രത്തിന്റെ പേര്.

കാർത്തിക് സുബ്ബരാജ് ഒരുക്കുന്ന മിറാക്കിൾ ആണ് അവസാനത്തേത്. ബോബി സിംഹ, മുത്തു കുമാർ എന്നിവരാണ് പ്രധാന അഭിനേതാക്കൾ.

ഒക്ടോബർ 16 ന് ചിത്രം ആമസോൺ പ്രൈമിൽ റിലീസ് ചെയ്യും.