Sreenivasan | ശ്രീനിവാസൻ സ്ക്രിപ്റ്റ് എടുക്കാൻ മറന്ന് വിമാനമേറി; ആ സിനിമ ക്‌ളാസിക്കായി

ഇന്നിറങ്ങുന്ന ചില സിനിമകളുടെ കഥപറയൽ കാണുമ്പോൾ സ്ക്രിപ്റ്റ് എടുക്കാൻ മറന്നുപോയതാണോ എന്ന് ചോദിക്കുന്നവരെ കാണാം. ഇവിടെ അക്ഷരാർത്ഥത്തിൽ തിരക്കഥാകൃത്ത് സ്ക്രിപ്റ്റ് എടുക്കാൻ മറന്നുപോയിരുന്നു. ആ തിരക്കഥാകൃത്ത് ശ്രീനിവാസൻ. ചിത്രത്തിൽ അഭിനയിക്കുന്ന പ്രധാന താരങ്ങൾ മോഹൻലാലും ശ്രീനിവാസനും. സംവിധാനം പ്രിയദർശൻ. ഇന്നാണെങ്കിൽ, വീട്ടിലേക്കോ സുഹൃത്തുക്കൾക്കോ ഒരു സന്ദേശം അയച്ചാൽ മാത്രം മതി. ആ സ്ക്രിപ്റ്റ് അതുപോലെ സ്കാൻ ചെയ്ത് ഇമെയിൽ വഴി, അതുമല്ലെങ്കിൽ വാട്സാപ്പ് വഴി അറ്റാച്ച് ചെയ്ത് എടുക്കേണ്ട കാലതാമസം മാത്രം. കമ്പിയില്ലാ കമ്പി കാലത്ത് അത് നടപ്പില്ല.

പ്രൊഡക്ഷൻ വാഹനത്തിന്റെ പുക തട്ടിയാൽ എഴുത്ത് തുടങ്ങുന്ന നടനായ രചയിതാവിനും, ടോയ്ലറ്റ് പേപ്പറിൽ വരെ ഡയലോഗ് എഴുതി പറയിച്ച് അത് തലമുറകളെ കൊണ്ട് ഏറ്റുപറയിക്കുന്ന സംവിധായകനും അതൊരു 'ഇഷ്യൂ' അല്ലായിരുന്നു.

"അമേരിക്കയിലേക്കുള്ള വിമാനം കയറുമ്പോൾ അച്ഛൻ 'അക്കരെ അക്കരെ അക്കരെ'യുടെ തിരക്കഥ നാട്ടിൽ വച്ചിട്ടുപോയി. തിരക്കഥയില്ലാതെയാണ് അദ്ദേഹം അവിടെ എത്തിയത്. പക്ഷേ അവിടെ എത്തി രണ്ട് ദിവസത്തിന് ശേഷം എങ്ങനെയോ അദ്ദേഹം അതൊപ്പിച്ച് സിനിമ പൂർത്തിയാക്കി," വിനീത് ശ്രീനിവാസൻ ഒരിക്കൽ പറയുകയുണ്ടായി.

'സാധനം കയ്യിലുണ്ടോ', 'നിന്റച്ഛനാടാ പോൾ ബാർബർ', 'മീനവിയൽ എന്തായോ എന്തോ' പോലത്തെ പ്രയോഗങ്ങൾ ഈ സിനിമ പ്രേക്ഷകർക്ക് സമ്മാനിച്ചതാണ്. ഇന്റർനെറ്റ് ഇല്ലാതിരുന്ന നാളിൽ, കടുത്ത സിനിമാ പ്രേമികൾക്ക് മാത്രം അറിയാമായിരുന്ന ജാപ്പനീസ് സംവിധായകൻ അക്കിര കുറസോവയുടെ പേര് സിനിമയിൽ ഒരിടത്ത് നടൻ സോമൻ കള്ളപ്പേരായി ഉപയോഗിച്ചിട്ടുള്ളതും കാണാം. പ്രധാനമായും അമേരിക്കയിൽ ചിത്രീകരിച്ച ആദ്യ മലയാള ചിത്രങ്ങളിൽ ഒന്നെന്ന പേരും ഈ സിനിമയ്ക്കുണ്ട്.

Summary: What happens if someone forgets to take the finished script and goes to the set? What if the script is here in India and the set is in America? That scriptwriter is Sreenivasan. The main actors in the film are Mohanlal and Sreenivasan. Directed by Priyadarshan. An behind the scene tale from the movie 'Akkare Akkare Akkare'