എഴുത്ത് കച്ചവടമായി കാണാത്ത രചയിതാവ്; എഴുതിയാൽ ശരിയാവുമോ എന്ന ശങ്കയിൽ പിറന്നത് ശ്രീനിവാസൻ ഹിറ്റുകൾ

ഭാര്യയെക്കാൾ ഉയരമുള്ള ഒരാളാവണം ഭർത്താവ്. കണ്ടാൽ എടുപ്പും ഗമയുമൊക്കെ വേണം. പറയാൻ കനത്തിൽ ഒരു ജോലിയും അതിനൊത്ത ശമ്പളവും. ഇടത്തരം മലയാളി കുടുംബത്തിലെ കഥയിൽ, ഭർത്താവ് കഥാപാത്രങ്ങൾ എങ്ങനെയാവും എന്ന പൊതുബോധത്തിലേക്കാണ് അങ്ങനെയൊന്നുമല്ലാത്ത നായകൻ തളത്തിൽ ദിനേശൻ ശോഭയെ വിവാഹം ചെയ്യുന്നത്. അധ്യാപനകനായാൽ കുട്ടികളെ നാലക്ഷരം പഠിപ്പിച്ച്, അവരെ നേർവഴിക്ക് നടത്തുന്ന, കുടുംബം നോക്കുന്ന ഉത്തരവാദിത്തപ്പെട്ട ഗൃഹസ്ഥനാവണം എന്ന ചിന്തയെ പാടെ പൊളിച്ചെഴുതിയ 'ചിന്താവിഷ്‌ടയായ ശ്യാമളയിലെ' വിജയൻ. ഭർത്താവിനെ നേർവഴിക്ക് കൊണ്ടുവരാൻ പാടുപെടുന്ന ശ്യാമള. ഒരു സുപ്രഭാതത്തിൽ ഭക്തിയുടെ ലഹരിയിൽ സർവ്വതും ഉപേക്ഷിച്ചു പോകുന്ന അയാളെ പ്രതീക്ഷിക്കാതെ അറിയാവുന്ന തൊഴിൽ ചെയ്ത് കുടുംബം പോറ്റുന്ന ശ്യാമള ഇന്നത്തെ പ്രോഗ്രസീവ് സ്ത്രീസമൂഹത്തിന്റെ 1998 മോഡൽ എന്ന് വിളിക്കാം. ഭാര്യ കാഞ്ചനയുടെ അതിമോഹത്തിന് താളംപിടിച്ച് പെരുവഴിയാധാരമാകുന്ന സുകുമാരൻ. ഗൾഫ് ബൂം ആരംഭിച്ച ശേഷമുള്ള കാലഘട്ടത്തെ മിഡിൽ ക്ലാസ് മലയാളി കുടുംബങ്ങളുടെ മോഹവും മോഹഭംഗവും പേറിയ കഥാപാത്രം.