Siddique|'പിരിയാനുള്ള കാരണം ഞങ്ങളോടു കൂടി മൺമറിയട്ടെ'; ഹിറ്റ് കൂട്ടുകെട്ട് അവസാനിപ്പിച്ചതിനെ കുറിച്ച് സിദ്ധീഖ് പറഞ്ഞത്

ബാലകൃഷ്ണന്റേയും ഗോപാല കൃഷ്ണന്റേയും മത്തായിച്ചനും അവരെ തേടിയെത്തിയ ഉറുമീസ് തമ്പാനും റാംജീ റാവും, ഉന്നം മറന്ന് തെന്നിപ്പറന്ന പൊന്നിൻ കിനാക്കളുമായി ഇൻ ഹരിഹർ നഗർ, ആനപ്പാറേലച്ചമ്മയും അഞ്ഞൂറാനും നിറഞ്ഞാടിയ ഗോഡ്ഫാദർ, കൃഷ്ണമൂർത്തിയും കെകെ ജോസഫും എത്തിപ്പെട്ട വിയറ്റ്നാം കോളനി, ചിരിപ്പിക്കുകയും ഒടുവിൽ കരയിക്കുകയും ചെയ്ത കന്നാസിന്റേയും കടലാസിന്റേയും കാബൂളിവാല. അങ്ങനെ എണ്ണം പറഞ്ഞ അഞ്ച് സൂപ്പർ ഹിറ്റുകൾ. കാബൂളിവാലയ്ക്കു ശേഷം ഇരുവരും പിരിഞ്ഞു.

ഇരുവരും പിണക്കത്തിലായി എന്നായിരുന്നു അക്കാലത്ത് പ്രചരിച്ച കഥകൾ. മാന്നാർ മത്തായി സ്പീക്കിങ്ങിന്റെ ചിത്രീകരണത്തിനിടെയുണ്ടായ പ്രശ്നങ്ങളാണ് കാരണമെന്നും കഥകളുണ്ടായി. എന്നാൽ ഇതിനെ കുറിച്ച് ഒരിക്കലും സിദ്ധീഖും ലാലും മറുപടി പറഞ്ഞിട്ടില്ല. ചോദ്യങ്ങളോടെല്ലാം ഇരുവരും ഒഴിഞ്ഞു മാറി.

ലാൽ എന്ന നടനെയും നിർമാതാവിനേയും സ്റ്റുഡിയോ മുതലാളിയേയും മലയാള സിനിമയ്ക്ക് നഷ്ടമാകാതിരിക്കാനാണ് അന്നത്തെ തീരുമാനം എന്ന് പിന്നീട് പറഞ്ഞ് സിദ്ധീഖ് പുഞ്ചിരിച്ചു. ലാൽ ആകട്ടെ കുറച്ചു കൂടി വ്യക്തമായി പറയും, കാരണമുണ്ട്, പക്ഷേ, അത് തുറന്നു പറഞ്ഞതു കൊണ്ട് ആർക്കും ഒരു ഗുണവും ഇല്ലെന്ന്.