കോവിഡ് വാക്സിൻ എടുത്ത ശേഷം കാഴ്ചശക്തി തിരിച്ചുകിട്ടി; 70 വയസുകാരിയുടെ അവകാശവാദം

കാഴ്ച ശക്തി നഷ്ടപ്പെട്ടയാൾക്ക് വർഷങ്ങൾക്കു ശേഷം പെട്ടെന്ന് ചില പ്രത്യേക സാഹചര്യങ്ങളിൽ കാഴ്ച തിരിച്ചു കിട്ടുന്നത് പൊതുവെ തട്ടുപൊളിപ്പൻ സിനിമകളിൽ കാണപ്പെടുന്ന ട്വിസ്റ്റാണ്. എന്നാൽ, കോവിഡ് പ്രതിരോധ വാക്സിൻ എടുത്ത ശേഷം വർഷങ്ങൾക്ക് മുമ്പ് നഷ്ടപ്പെട്ട കാഴ്ചശക്തി തിരിച്ചു കിട്ടിയ ട്വിസ്റ്റ് യാഥാർത്ഥ്യത്തിൽ സംഭവിച്ചിരിക്കുന്നു. മഹാരാഷ്ട്രയിൽ നിന്നുള്ള 70കാരിയായ സ്ത്രീയാണ് കോവിഡ് പ്രതിരോധത്തിനായി കോവിഷീൽഡ് വാക്സിൻ എടുത്ത ശേഷം നഷ്ടപ്പെട്ട കാഴ്ചശക്തി ഭാഗികമായി വീണ്ടെടുത്തുവെന്ന് അവകാശപ്പെടുന്നത്. രാജ്യത്ത് വാക്സിന് എതിരെ വ്യാജപ്രചാരണങ്ങൾ നടക്കുന്നതിനാൽ പലരും ഇതിന് മടിക്കുന്നുണ്ടെങ്കിലും നല്ലൊരു ശതമാനം ആൾക്കാർ ഇതിനകം വാക്സിൻ എടുത്തിട്ടുണ്ട്. ഇതിനിടെയാണ്, ഇത്തരം വിചിത്ര സംഭവങ്ങൾ റിപ്പോർട്ട് ചെയ്യപ്പെടുന്നത്.