Mamata Banerjee | 'എനിക്ക് കോവിഡ് ബാധിച്ചാൽ മമത ബാനർജിയെകെട്ടിപ്പിടിക്കും'; ബിജെപി ദേശീയ സെക്രട്ടറി അനുപം ഹസ്ര

"കൊറോണയേക്കാൾ വലിയ ശത്രുവിനോടാണ് ഞങ്ങളുടെ പ്രവർത്തകർ പോരാടുന്നത്. അവർ മമത ബാനർജിയോട് പോരാടുകയാണ്. ബിജെപി പ്രവർത്തകർക്ക് മമത ബാനർജിക്ക് എതിരെ മുഖം മൂടിയില്ലാതെ പോരാടാൻ കഴിയുമ്പോൾ അവർക്ക് കോവിഡിന് എതിരെയും മുഖം മൂടിയില്ലാതെ പോരാടാൻ കഴിയുമെന്നാണ് കരുതുന്നത്' - ഹസ്ര പറഞ്ഞു. തനിക്ക് കൊറോണ വൈറസ് ബാധിച്ചാൽ താൻ മമത ബാനർജിയെ കാണാൻ പോകുകയും അവരെ കെട്ടിപ്പിടിക്കുകയും ചെയ്യുമെന്ന് അദ്ദേഹം പറഞ്ഞു.

അതേസമയം, ഹസ്രയുടെ പരാമർശത്തെ അപലപിച്ച തൃണമൂൽ കോൺഗ്രസ് നേതാവ് സുഗതോ റോയ് ബിജെപിയുടെ മാനസികനിലയാണ് ഇത് വ്യക്തമാക്കുന്നതെന്നും പറഞ്ഞു. ഇത്തരം വാക്കുകളും പ്രസ്താവനകളും ബിജെപി നേതാക്കളിൽ നിന്ന് മാത്രമേ വരൂ. പാർട്ടിയുടെ മാനസികനിലയാണ് ഇത് വ്യക്തമാക്കുന്നത്. ഇത്തരം ഭ്രാന്തൻ പ്രസ്താവനകളെ തങ്ങൾ അപലപിക്കുന്നതായും അദ്ദേഹം പറഞ്ഞു. അതേസമയം, സിലിഗുരിയിലെ തൃണമൂൽ കോൺഗ്രസ് യൂണിറ്റ് ഹസ്രയ്ക്കെതിരെ ഒരു റാലി നടത്തുകയും അദ്ദേഹത്തിന് എതിരെ പൊലീസിൽ പരാതി നൽകുകയും ചെയ്തു.

അതേസമയം, പ്രധാനമന്ത്രി നരേന്ദ്ര മോദിക്കെതിരെ മമത ബാനർജിയും നിരവധി വിവാദ പരാമർശങ്ങൾ നടത്തിയിട്ടുണ്ടെന്ന് പരാതികളോട് പ്രതികരിക്കവെ ഹസ്ര പറഞ്ഞു. 'എന്റെ പരാമർശങ്ങൾ അപമാനകരമാണെങ്കിൽ പ്രധാനമന്ത്രി നരേന്ദ്ര മോദിക്കെതിരെ മമത ബാനർജിയും ഇത്തരം പരാമർശങ്ങൾ നടത്തിയിരുന്നു. എനിക്കെതിരെ ഒരു എഫ് ഐ ആർ രജിസ്റ്റർ ചെയ്തിട്ടുണ്ടെങ്കിൽ തൃണമൂൽ നേതാക്കൾക്ക് എതിരെ 10 എഫ് ഐ ആർ രജിസ്റ്റർ ചെയ്യണം' - ഹസ്ര പറഞ്ഞു. അതേസമയം, സംസ്ഥാന ബി ജെ പി നേതൃത്വം ഹസ്രയ്ക്ക് പിന്തുണ പ്രഖ്യാപിച്ചില്ല. 'ഇത്തരത്തിലുള്ള പ്രസ്താവനകളെ ഞങ്ങൾ പിന്തുണയ്ക്കുന്നില്ല, ഇത്തരം പരാമർശങ്ങൾ ഒഴിവാക്കണം' - സംസ്ഥാന ബിജെപി നേതാവ് പറഞ്ഞു.