എഐ ഉച്ചകോടിയിലെ കോൺഗ്രസ് പ്രതിഷേധം നേപ്പാളിലെ ജെൻ സി മോഡൽ;വൻ ഗൂഢാലോചനയുടെ ഭാഗമെന്ന് ഡൽഹി പോലീസ്

പ്രതിഷേധത്തിന് പിന്നിലെ സാമ്പത്തിക സ്രോതസ്സുകളെക്കുറിച്ചും പോലീസ് അന്വേഷിക്കുന്നുണ്ട്. "പ്രധാനമന്ത്രി വിട്ടുവീഴ്ച ചെയ്തു", "ഇന്ത്യ-യുഎസ് വ്യാപാര കരാർ", "എപ്‌സ്റ്റൈൻ ഫയലുകൾ" തുടങ്ങിയ സന്ദേശങ്ങൾ അച്ചടിച്ച ടി-ഷർട്ടുകളുടെ നിർമ്മാണത്തിന് പണം നൽകിയത് ആരാണെന്ന കാര്യവും അന്വേഷണപരിധിയിലുണ്ട്. പത്തോളം യൂത്ത് കോൺഗ്രസ് പ്രവർത്തകരാണ് ന്യൂഡൽഹിയിലെ ഉച്ചകോടി വേദിയിൽ അതിക്രമിച്ച് കയറി ഇന്ത്യ-യുഎസ് വ്യാപാര കരാറിനെതിരെ പ്രധാനമന്ത്രി നരേന്ദ്ര മോദിക്കെതിരെ മുദ്രാവാക്യം വിളിച്ച് പ്രതിഷേധിച്ചത്. പ്രധാനമന്ത്രിയുടെയും യുഎസ് പ്രസിഡന്റ് ഡൊണാൾഡ് ട്രംപിന്റെയും ചിത്രങ്ങൾ അച്ചടിച്ച വെള്ള ടി-ഷർട്ടുകൾ ധരിച്ചായിരുന്നു ഇവരുടെ പ്രതിഷേധം.

ഉച്ചകോടി തടസ്സപ്പെടുത്തിയതിന് സുരക്ഷാ ഉദ്യോഗസ്ഥർ ഉടൻ ഇടപെടുകയും പ്രതിഷേധക്കാരെ അറസ്റ്റ് ചെയ്യുകയും ചെയ്തു. ഈ സംഭവം വലിയ രാഷ്ട്രീയ വിവാദങ്ങൾക്കാണ് വഴിതുറന്നത്. പ്രതിഷേധം രാജ്യവിരുദ്ധമാണെന്നും ഇന്ത്യയുടെ ആഗോള പ്രതിച്ഛായയ്ക്ക് മങ്ങലേൽപ്പിച്ചെന്നും ബിജെപി നേതാക്കൾ കുറ്റപ്പെടുത്തി. അതേസമയം യുവാക്കളുടെ രോഷം പ്രതിഫലിപ്പിക്കുന്ന ജനാധിപത്യപരമായ പ്രതിഷേധമാണ് നടന്നതെന്നാണ് കോൺഗ്രസ് പ്രതികരിച്ചത്.

ചില രാഷ്ട്രീയ പാർട്ടികൾ ഇന്ന് 'അർബൻ നക്സലിസത്തിന്റെ' ഭാഗമായി മാറിയിരിക്കുകയാണെന്ന് ബിജെപി നേതാവ് നിതിൻ നബിൻ ആരോപിച്ചു. മുൻപ് ഇത്തരം ചിന്താഗതികൾ പാർട്ടികളെ സ്വാധീനിച്ചിരുന്നെങ്കിൽ ഇന്ന് അവർ അതിൽ പൂർണ്ണമായും ലയിച്ചിരിക്കുകയാണെന്നും, ഇന്ത്യയെ ലോകം ചർച്ച ചെയ്യുന്ന വേളയിൽ ഇത്തരം ലജ്ജാകരമായ പ്രവൃത്തികൾ രാജ്യത്തിന്റെ പുരോഗതിയെ ബാധിക്കുമെന്നും അദ്ദേഹം കൂട്ടിച്ചേർത്തു.