ഡി.കെ. ശിവകുമാറിന്റെ മാസ്റ്റർ സ്ട്രോക്ക്? YSR തെലങ്കാന അധ്യക്ഷ ശർമിള കൂടിക്കാഴ്ച; കോൺഗ്രസുമായി സഖ്യമെന്ന് സൂചന

ഇരു നേതാക്കളും തമ്മിലുള്ള സൗഹാർദ്ദപരമായ കൂടിക്കാഴ്ച മാത്രമാണിതെന്നാണ് ശിവകുമാറിന്റെ ഓഫീസ് അറിയിച്ചത്. അന്തരിച്ച ആന്ധ്രാപ്രദേശ് മുഖ്യമന്ത്രി വൈഎസ്ആർ രാജശേഖര റെഡ്ഡിയുടെ കാലം മുതൽ ശർമിള റെഡ്ഡിയുടെ അടുത്ത കുടുംബ സുഹൃത്താണ് ശിവകുമാർ. അത്തരത്തിലുള്ള ഒരു കൂടിക്കാഴ്ച എന്നതിനപ്പുറം ഈ സന്ദർശനത്തിന് മറ്റ് രാഷ്ട്രീയമാനങ്ങൾ ഇല്ലെന്നും ശിവകുമാറിന്റെ ഓഫീസ് കൂട്ടിച്ചേർത്തു.

എന്നാൽ തെലങ്കാനയിൽ കോൺഗ്രസുമായി സഖ്യമുണ്ടാക്കാൻ ശർമിള റെഡ്ഡി ആഗ്രഹിക്കുന്നുവെന്നും ശിവകുമാറുമായി ഇത് സംബന്ധിച്ച് സംസാരിച്ചതായും ചില കോൺഗ്രസ്സ് വൃത്തങ്ങൾ അറിയിച്ചു. കർണാടകയിലെ തിരഞ്ഞെടുപ്പിൽ കോൺഗ്രസ്സ് നേടിയ ഉജ്വലവിജയത്തിന്റെ ശില്പി ഡി.കെ. ആണെന്ന് വൈഎസ്ആർ കരുതുന്നു. ആ ജനസമ്മിതിയും തന്ത്രങ്ങളും തെലങ്കാനയിലും ഉപയോഗിക്കാനാണ് ശർമിള ആഗ്രഹിക്കുന്നത്. വരാനിരിക്കുന്ന നിയമസഭാ – ലോക്സഭാ തിരഞ്ഞെടുപ്പുകളിൽ കോൺഗ്രസുമായുള്ള ഒരു സഖ്യത്തിനുള്ള സാധ്യതകളെ വൈഎസ്ആർ നേതാക്കൾ ഇതുവരെ തള്ളിക്കളഞ്ഞിട്ടില്ല.

അതേസമയം, ഈ വർഷം അവസാനം നടക്കാനിരിക്കുന്ന അസംബ്ലി തിരഞ്ഞെടുപ്പിന് മുമ്പ് ഭാരത് രാഷ്ട്ര സമിതി (ബിആർഎസ്) വിരുദ്ധ വോട്ടുകൾ ഏകീകരിക്കാനാണ് കോൺഗ്രസ് ശ്രമിക്കുന്നത്. കൂടാതെ ലോകസഭാ തിരഞ്ഞെടുപ്പിലും പരമാവധി സീറ്റെന്ന ലക്ഷ്യത്തിന് പ്രാദേശിക സഖ്യങ്ങൾ ഗുണം ചെയ്യുമെന്നാണ് കോൺഗ്രസ് കണക്ക് കൂട്ടുന്നത്.