INS Vikrant | രണ്ടു ഫുട്ബോൾ മൈതാനത്തേക്കാൾ നീളം; കൊച്ചി നഗരത്തിനു വേണ്ടതിനു പകുതി വൈദ്യുതി; INS വിക്രാന്തെന്ന അഭിമാനം

വിക്രാന്ത് എന്ന സംസ്‌കൃത പദത്തിലെ ‘വി’യുടെ അർത്ഥം അസാധാരണം എന്നാണ്. ‘ക്രാന്ത്’ എന്നാൽ ഒരു ദിശയിലേക്ക് നീങ്ങുക അല്ലെങ്കിൽ മുന്നേറുക എന്നും. “നമ്മുടെ പ്രതിരോധ സജ്ജീകരണത്തെ ശക്തിപ്പെടുത്തുന്നതിനുള്ള മറ്റൊരു ചുവടുവയ്പ്പ് മാത്രമല്ല വിക്രാന്ത്. 1971 ലെ യുദ്ധത്തിൽ നമ്മുടെ സ്വാതന്ത്ര്യ സമര സേനാനികളും രാജ്യത്തിന്റെ സ്വാതന്ത്ര്യത്തിനായി നമ്മുടെ ധീരരായ സൈനികരും നടത്തിയ ത്യാഗങ്ങൾക്കുള്ള നമ്മുടെ എളിയ ആദരവ് കൂടിയാണ്”, ഇന്ത്യൻ നാവികസേന പറഞ്ഞു.

262 മീറ്റർ വരെ നീളമുള്ള ഐഎൻഎസ് വിക്രാന്തിന് രണ്ട് ഫുട്ബോൾ മൈതാനങ്ങളേക്കാൾ നീളവും 62 മീറ്റർ വീതിയും ഉണ്ട്. 14 ഡെക്കുകളിലായി 59 മീറ്റർ ഉയരമുള്ള ഈ കപ്പലിൽ 2,300-ലധികം കമ്പാർട്ടുമെന്റുകൾ ഉണ്ട്. 1,600 പേരടങ്ങിയ ക്രൂവിനെ ഉൾക്കൊള്ളാനും സാധിക്കും. വനിതാ ഓഫീസർമാർക്ക് പ്രത്യേക ക്യാബിനുകൾ ഉണ്ട്.

ഐഎന്‍എസ് വിക്രാന്തിന്‍റെ ആകെ വിസ്തൃതി 174,580 ചതുരശ്ര അടിയാണ്. നാല് ഏക്കർ സ്ഥലം എന്നു പറയാം. കൊച്ചി ലുലു ഹൈപ്പർമാക്കറ്റിന്റെ ഒരു നിലയുടെ വലിപ്പം വരും ഈ വിമാനവാഹിനി കപ്പലിന്.

2009-ൽ കൊച്ചിൻ ഷിപ്പ്‌യാർഡ് ലിമിറ്റഡിൽ നിർമാണം ആരംഭിച്ച കപ്പലിന്റെ ആകെ ചെലവ് ഏകദേശം 23,000 കോടി രൂപയാണ്. കപ്പലിന്റെ പ്രവർത്തനത്തിനായി ഉപയോ​ഗിക്കുന്ന വൈദ്യുതിക്ക് കൊച്ചി നഗരത്തിന്റെ പകുതി ഭാഗവും പ്രകാശിപ്പിക്കാൻ കഴിയുമെന്ന് ഉദ്യോ​ഗസ്ഥർ പറയുന്നു. കപ്പലിലെ എല്ലാ കേബിളുകൾക്കുമായി മൊത്തം 2,600 കിലോമീറ്റർ നീളമുണ്ട്. കപ്പലിൽ ഉപയോഗിച്ചിരിക്കുന്ന ഉരുക്ക് മൂന്ന് ഈഫൽ ടവറുകൾക്ക് തുല്യമാണ്. “രണ്ട് ഓപ്പറേഷൻ തിയറ്ററുകളുള്ള, പൂർണമായും പ്രവർത്തനക്ഷമമായ ഒരു മെഡിക്കൽ കോംപ്ലക്സ് കപ്പലിലുണ്ട്. 2000 ജീവനക്കാരുടെയെങ്കിലും ആവശ്യങ്ങൾ നിറവേറ്റാൻ സാധിക്കുന്ന ഒരു അടുക്കളയുണ്ട്. ഇതിൽ 20 വിമാനങ്ങൾ പാർക്ക് ചെയ്യാം”, എന്നാണ് ഡിസൈനർ ആർക്കിടെക്റ്റ് മേജർ മനോജ് കുമാർ 2021 ഓഗസ്റ്റിൽ മാധ്യമപ്രവർത്തകരോട് പറഞ്ഞത്.

28 നോട്ടിക്കൽ മൈൽ വരെ പരമാവധി വേഗം ആർജിക്കാവുന്നതാണ് കപ്പൽ. അഥവാ 52 കിലോമീറ്റർ വരെ വേഗം കൈക്കൊള്ളാൻ കഴിയും ഈ വിമാനവാഹിനിക്ക്. എൻഡുറൻസ് അഥവാ നിർത്താതെ പരമാവധി സഞ്ചരിക്കാനുള്ള ശേഷിയാണ് വിമാനവാഹിനികളുടെ കരുത്ത് അളക്കാനുള്ള പ്രധാന മാനദണ്ഡം. 14,000 ആണ് വിക്രാന്തിന്റെ എൻഡുറൻസ്. കടലിൽ ഒറ്റയടിക്കു പോകാവുന്ന ദൂരമാണിത്.

ഫിക്‌സഡ് വിംഗ്, റോട്ടറി എയർക്രാഫ്റ്റ് എന്നിവയുടെ ഒരു ശേഖരം പ്രവർത്തിപ്പിക്കാനാണ് കപ്പൽ രൂപകൽപന ചെയ്തിരിക്കുന്നതെന്ന് പ്രതിരോധ മന്ത്രാലയം അറിയിച്ചു. റഷ്യൻ നിർമ്മിത മിഗ് -29 കെ ഫൈറ്റർ ജെറ്റും കമോവ് -31 ഹെലികോപ്റ്ററുകളും വഹിക്കാനുള്ള ശേഷി വിക്രാന്തിനുണ്ടെന്ന് നാവികസേന അറിയിച്ചു. തദ്ദേശീയമായി നിർമിച്ച അഡ്വാൻസ്ഡ് ലൈറ്റ് ഹെലികോപ്റ്ററുകളും (ALH) അമേരിക്കൻ പ്രതിരോധ കമ്പനിയായ ലോക്ഹീഡ് മാർട്ടിൻ നിർമ്മിച്ച MH-60R മൾട്ടിറോൾ ഹെലികോപ്റ്ററുകളും വിക്രാന്തിന് വഹിക്കാനാകും.

വിക്രാന്തിനു മുൻപ് ഇന്ത്യൻ നാവികസേനയിലുണ്ടായിരുന്ന ഒരേയൊരു വിമാനവാഹിനിക്കപ്പൽ ഐഎൻഎസ് വിക്രമാദിത്യ ആയിരുന്നു. ഇത് മുൻ സോവിയറ്റ് യൂണിയനും തുടർന്ന് റഷ്യൻ നാവികസേനയും ഉപയോ​ഗപ്പെടുത്തിയിട്ടുണ്ട്. 2013-ലാണ് ഐഎൻഎസ് വിക്രമാദിത്യ ഇന്ത്യൻ നാവികസേനയുടെ ഭാഗമായത്.

കാരിയറിലുള്ള 76 ശതമാനത്തിലധികം മെറ്റീരിയലുകളും ഉപകരണങ്ങളും തദ്ദേശീയമായി നിർമിച്ചതാണ്. ഇന്ത്യൻ നാവികസേനയുടെ കപ്പലുകളിൽ ആദ്യമായി ഉപയോഗിച്ചതുൾപ്പെടെയുള്ള വസ്തുക്കൾ ഐഎൻ‌എസ് വിക്രാന്തിന്റെ നിർമാണത്തിനായും ഉപയോ​ഗിച്ചിട്ടുണ്ട്.

വിക്രാന്ത് പൂര്‍ണ സജ്ജമായതോടെ മൂന്നാമത്തെ വിമാനവാഹിനിയായ ഐഎന്‍എസ് വിശാൽ നിര്‍മിക്കാനുള്ള കേന്ദ്രസര്‍ക്കാരിന്റെ അനുമതി നേടിയെടുക്കാനുള്ള തീവ്ര ശ്രമത്തിലാണ് ഇന്ത്യന്‍ നാവികസേന. ഇന്ത്യ മൂന്നാമത്തെ വിമാനവാഹിനിക്കപ്പല്‍ നിര്‍മ്മിക്കുന്നതുമായി ബന്ധപ്പെട്ട റിപ്പോര്‍ട്ടുകള്‍ ഏറെ കാലമായി പുറത്തു വരുന്നുണ്ടെങ്കിലും ഇതുവരെ നടപടികളൊന്നും തന്നെ ആരംഭിച്ചിട്ടില്ല. മൂന്നാമത്തെ വിമാനവാഹിനിക്കപ്പലിനെ കുറിച്ച് നാവികസേനയും സർക്കാരും തമ്മിലുള്ള ചർച്ചകൾ ഇപ്പോഴും തുടരുകയാണ്. റഷ്യൻ മിഗ് 29 കെ വിമാനം ഐഎൻഎസ് വിക്രമാദിത്യയിൽ നിന്നാണ് പ്രവർത്തിക്കുന്നത്. അവയിൽ ചിലത് ഒരു ദശാബ്ദത്തിനുള്ളിൽ ഡീകമ്മീഷൻ ചെയ്യപ്പെടും.