CAA പ്രതിഷേധം: ജാമിയ വിദ്യാർഥികളുടെ പ്രകടനത്തിനുനേരെ തോക്കുധാരി വെടിയുതിർത്തു; വെടിവെച്ചത് ജയ് ശ്രീറാം വിളിച്ചുകൊണ്ട്

“തോക്ക് ചൂണ്ടിക്കൊണ്ട് പാഞ്ഞടുത്ത അക്രമി 'യെ ലോ ആസാദി (നിങ്ങളുടെ സ്വാതന്ത്ര്യം എടുക്കുക), വരൂ, ഞാൻ നിങ്ങളെ വെടിവച്ചുകൊല്ലാം' എന്ന് ആക്രോശിക്കുകയും തുടർന്ന് പ്രതിഷേധക്കാർക്ക് നേരെ വെടിയുതിർക്കുകയും ചെയ്തു," പ്രതിഷേധത്തിൽ പങ്കെടുത്ത ഒരു വിദ്യാർത്ഥി ന്യൂസ് 18 നോട് പറഞ്ഞു. പൊലീസ് സ്ഥലത്തുണ്ടായിരുന്നപ്പോഴാണ് ആക്രമണം നടന്നത്.

ആക്രമണത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. പ്രതിഷേധക്കാർക്ക് ഇന്ത്യയിൽ തുടരാൻ താൽപ്പര്യമുണ്ടെങ്കിൽ 'വന്ദേമാതരം' വിളിക്കണമെന്നും അക്രമി പ്രതിഷേധക്കാരോട് പറഞ്ഞുകൊണ്ടാണ് വെടിയുതിർത്തത്. കശ്മീരിലെ ദോഡ ജില്ലയിൽനിന്നുള്ള ഷാദാബിന്‍റെ ഇടതുകൈയിലാണ് വെടിയേറ്റത്. ഇയാളെ ജാമിയ നഗറിലെ ഹോളി ഫാമിലി ആശുപത്രിയിൽ പ്രവേശിപ്പിച്ചു. പിന്നീട് ഡൽഹി എയിംസിലേക്ക് മാറ്റുകയും ചെയ്തു.

തോക്കുധാരിയുടെ ഫേസ്ബുക്ക് പ്രൊഫൈൽ, പോലീസ് കണ്ടെത്തിയിട്ടുണ്ടെങ്കിലും സ്ഥിരീകരിച്ചിട്ടില്ല. 2018 ൽ യുപിയിലെ കസ്ഗഞ്ചിൽ റിപ്പബ്ലിക് ദിനത്തിൽ നടന്ന ഏറ്റുമുട്ടലിൽ അഭിഷേക് ഗുപ്ത കൊല്ലപ്പെട്ടതിനെ പരാമർശിച്ച് പ്രതികാരം ചെയ്യുമെന്ന് ഫേസ്ബുക്കിൽ പോസ്റ്റിട്ടതിന് പിന്നാലെയാണ് വെടിവെപ്പുണ്ടായത്. സോഷ്യൽ മീഡിയ അക്കൗണ്ടിലെ മറ്റ് പോസ്റ്റുകളിൽ 'രംഭക്ത്' എന്ന വിശേഷണത്തോടെയാണ് ഇയാൾ പോസ്റ്റുകൾ ഇട്ടിരുന്നത്. 'ഗെയിം ഓവർ, ഷഹീൻ ബാഗ്' എന്നും "എന്റെ അവസാന യാത്രയിൽ എന്നെ കാവിയിൽ പൊതിയുക" എന്നും ഫേസ്ബുക്കിൽ ഇദ്ദേഹം പോസ്റ്റുകളിട്ടിട്ടുണ്ട്. ഷൂട്ടിംഗിന് മുമ്പ് റാലിയിൽ നിന്ന് നിരവധി വീഡിയോകളും അദ്ദേഹം പോസ്റ്റ് ചെയ്തിരുന്നു.