ലക്ഷദ്വീപ് അടുത്ത മാലിദ്വീപാകുമോ? സഞ്ചാരികള്‍ക്ക് 8 മെഗാ പ്രോജക്ടുകളുമായി കേന്ദ്രസര്‍ക്കാര്‍

വലിയ കപ്പലുകള്‍ക്ക് കവരത്തി, അഗത്തി, മിനിക്കോയ് ദ്വീപുകളിലേക്ക് വരാനുള്ള സൗകര്യം, കല്‍പേനി, കടമത്ത്, ആന്ത്രോത്ത് ദ്വീപുകളില്‍ ആധുനിക സജ്ജീകരണങ്ങളടങ്ങിയ യാത്രക്കാരുടെ വിശ്രമകേന്ദ്രങ്ങള്‍, കല്‍പേനി, കടമത്ത് ദ്വീപുകളില്‍ ക്രൂയിസ് കപ്പലുകള്‍ക്ക് വരെ എത്താന്‍ പാകത്തിലുള്ള ജെട്ടികളുടെ വികസനം എന്നിങ്ങനെ നീളുന്ന പട്ടികയാണ് കേന്ദ്രസര്‍ക്കാരിന്റെ പരിഗണനയിലുള്ളത്. 303 കോടി രൂപയുടെ ആദ്യ പദ്ധതി ഉടന്‍ തന്നെ ആരംഭിക്കുമെന്നാണ് സര്‍ക്കാര്‍ വൃത്തങ്ങള്‍ നല്‍കുന്ന സൂചന. കടമത്ത് ദ്വീപിലെ ജെട്ടികളുടെ നിര്‍മാണത്തിനാണ് ഈ പദ്ധതിയില്‍ പ്രാധാന്യം നല്‍കിയിരിക്കുന്നത്.

പദ്ധതിയ്ക്കായി ടെന്‍ഡറുകളും ക്ഷണിച്ചിട്ടുണ്ട്. ദ്വീപില്‍ സര്‍വീസ് നടത്തുന്ന യാത്രകപ്പലുകള്‍ക്ക് എത്താന്‍ കഴിയുന്ന മള്‍ട്ടിമോഡല്‍ ജെട്ടി വികസിപ്പിച്ച് ഇതിലൂടെ ദ്വീപിലുടനീളമുള്ള സഞ്ചാരം സുഗമമാക്കുക എന്നതാണ് പദ്ധതിയിലൂടെ ലക്ഷ്യമിടുന്നത്. ഇതിലൂടെ സഞ്ചാരികളെ ആകര്‍ഷിക്കാനും സാധിക്കുന്നു. കൂടാതെ ലക്ഷദ്വീപിലെ ജനവാസമുള്ള ദ്വീപുകളില്‍ തുറമുഖവും ഷിപ്പിംഗ് സൗകര്യവും വികസിപ്പിക്കാനും കേന്ദ്രസര്‍ക്കാര്‍ പദ്ധതിയിടുന്നുണ്ട്. ഇതിലൂടെ സഞ്ചാരികളുടെ യാത്ര സുഗമമാകുകയും ചരക്കുഗതാഗതം തടസങ്ങളില്ലാതെ മുന്നോട്ടുപോകുകയും ചെയ്യും.

'കടമത്ത് ദ്വീപില്‍ നിര്‍മാണം നടത്താനുദ്ദേശിക്കുന്ന ഓപ്പണ്‍ ജെട്ടി യാത്രാ കപ്പലുകള്‍ക്കും ക്രൂയിസ് കപ്പലുകള്‍ക്കും നങ്കൂരമിടാനുള്ള സൗകര്യം ഒരുക്കും. ജെട്ടിയുടെ നീളം 360 മീറ്റര്‍ ആണ്. അതുകൊണ്ട് തന്നെ ക്രൂയിസ് കപ്പലുകള്‍ക്കും നങ്കൂരമിടാന്‍ സാധിക്കും,' കേന്ദ്രസര്‍ക്കാര്‍ പുറത്തിറക്കിയ രേഖയില്‍ പറയുന്നു. കൂടാതെ ലോകോത്തര നിലവാരത്തിലുള്ള യാത്രക്കാരുടെ വിശ്രമമുറിയും ഇതിനോടനുബന്ധിച്ച് സ്ഥാപിക്കുമെന്നും വൃത്തങ്ങള്‍ അറിയിച്ചു.

കേന്ദ്രസര്‍ക്കാരിന്റെ സാഗര്‍മാല പദ്ധതി, ലക്ഷദ്വീപിലെ ആഭ്യന്തര ഫണ്ട് എന്നിവയുപയോഗിച്ചാണ് ദ്വീപിലെ വികസന പദ്ധതികള്‍ നടപ്പാക്കുന്നത്. പദ്ധതികള്‍ക്കാവശ്യമായ സാങ്കേതിക പിന്തുണ നല്‍കുന്നത് കൊച്ചിന്‍ തുറമുഖ അതോറിറ്റിയാണ്. ചെന്നൈ ആസ്ഥാനമാക്കി പ്രവര്‍ത്തിക്കുന്ന അസിസ്റ്റം ഇന്ത്യ ലിമിറ്റഡ് (Assystem India Limited ) പദ്ധതിയുമായി ബന്ധപ്പെട്ട വിശദമായ റിപ്പോര്‍ട്ടും തയ്യാറാക്കിയിട്ടുണ്ട്.

ദ്വീപിലെ ജനങ്ങള്‍ മറ്റ് ദ്വീപുകളിലേക്ക് പോകാന്‍ പ്രധാനമായും ജലഗതാഗതത്തെയാണ് ആശ്രയിക്കുന്നത്. കൂടാതെ ദ്വീപിലേക്ക് ആവശ്യമായ ചരക്കുകള്‍ കൊച്ചി, ബേപ്പൂര്‍, മംഗളുരു എന്നിവിടങ്ങളില്‍ നിന്നാണ് എത്തിക്കുന്നത്. ദ്വീപിലെ ജനങ്ങള്‍ മെഡിക്കല്‍ സൗകര്യങ്ങള്‍ക്കും ഉന്നതവിദ്യാഭ്യാസത്തിനുമായി കേരളത്തെയാണ് ആശ്രയിച്ചുവരുന്നത്. മണ്‍സൂണ്‍ അവസാനിക്കുന്നതോടെയാണ് വിനോദസഞ്ചാരികള്‍ കപ്പല്‍മാര്‍ഗം ദ്വീപിലേക്ക് എത്തുന്നത്. കൂടാതെ ദ്വീപില്‍ നിന്ന് മത്സ്യവും നാളികേരവും കടല്‍മാര്‍ഗം കയറ്റുമതി ചെയ്യുന്നുമുണ്ട്.