ഹിജാബിന് പിന്നാലെ കീറിയ ജീന്‍സിനും ടീഷര്‍ട്ടിനും നിരോധനമേര്‍പ്പെടുത്തി മുംബൈ കോളേജ്

''ക്യാംപസില്‍ വിദ്യാര്‍ത്ഥികള്‍ മാന്യമായ വസ്ത്രം ധരിക്കണം. ആണ്‍കുട്ടികള്‍ക്ക് ഹാഫ് സ്ലീവ് ഷര്‍ട്ട്, അല്ലെങ്കില്‍ ഫുള്‍ സ്ലീവ് ഷര്‍ട്ടും പാന്റും ധരിക്കാം. പെണ്‍കുട്ടികള്‍ക്ക് ഇന്ത്യന്‍ വസ്ത്രങ്ങളും പാശ്ചാത്യ വസ്ത്രങ്ങളും ധരിക്കാം. എന്നാല്‍ മതപരമായതോ സാംസ്‌കാരികമായ വ്യത്യസ്തതകള്‍ വെളിവാക്കുന്ന വസ്ത്രധാരണം പാടില്ല. ജീന്‍സ്, ടിഷര്‍ട്ട്, ജഴ്‌സികള്‍ എന്നിവയൊന്നും ധരിക്കാന്‍ പാടില്ല,'' കോളേജ് പുറത്തിറക്കിയ നോട്ടീസില്‍ പറയുന്നു.

ബുര്‍ഖ, ഹിജാബ്, ബാഡ്ജ്, തൊപ്പി എന്നിവ കോളേജിനുള്ളില്‍ ധരിക്കാന്‍ പാടില്ലെന്നും സര്‍ക്കുലറില്‍ വ്യക്തമാക്കി. പുതിയ ഡ്രസ് കോഡ് നിയമങ്ങള്‍ അറിയാതെ ജീന്‍സും ടീ ഷര്‍ട്ടും ധരിച്ചെത്തിയ വിദ്യാര്‍ത്ഥികളെ കോളേജിനുള്ളില്‍ പ്രവേശിപ്പിച്ചിരുന്നില്ലെന്നും റിപ്പോര്‍ട്ട് ഉണ്ട്. നേരത്തെ ഹിജാബ്, നഖബ്, ബുര്‍ഖ, സ്റ്റോള്‍ എന്നിവയ്ക്കും കോളേജില്‍ വിലക്കേര്‍പ്പെടുത്തിയിരുന്നു. കോളെജിന്റെ ഈ ഉത്തരവിനെ ചോദ്യം ചെയ്ത് ചില വിദ്യാര്‍ത്ഥികള്‍ ബോംബൈ ഹൈക്കോടതിയെ സമീപിക്കുകയും ചെയ്തിരുന്നു. എന്നാല്‍ കോളേജിന്റെ തീരുമാനത്തില്‍ ഇടപെടാന്‍ കഴിയില്ലെന്ന് പറഞ്ഞ ഹൈക്കോടതി ഈ ഹര്‍ജി തള്ളുകയായിരുന്നു.

എല്ലാ മതത്തിലും ജാതിയിലും പെട്ട വിദ്യാര്‍ത്ഥികളെ ലക്ഷ്യമിട്ട് കൊണ്ടാണ് പുതിയ ഡ്രസ് കോഡ് കോളേജില്‍ പ്രാബല്യത്തില്‍ വരുത്തിയതെന്ന് കോളേജ് മാനേജ്‌മെന്റിന് വേണ്ടി ഹാജരായ സീനിയര്‍ അഭിഭാഷകന്‍ അനില്‍ അന്റൂര്‍ക്കര്‍ പറഞ്ഞു. ഏകീകൃത ഡ്രസ് കോഡ് കൊണ്ടുവരുന്നതിന്റെ ഭാഗമായാണ് ബുര്‍ഖ, ഹിജാബ് എന്നിവയ്ക്ക് വിലക്കേര്‍പ്പെടുത്തിയതെന്നും കോളേജ് അധികൃതര്‍ വ്യക്തമാക്കി. തീരുമാനം മുസ്ലീങ്ങളെ വേദനിപ്പിക്കാനുദ്ദേശിച്ച് കൊണ്ടല്ലെന്നും കോളേജ് അധികൃതര്‍ പറഞ്ഞു.