'എന്റെ അനുഭവം ഗഗൻയാൻ ദൗത്യത്തിൽ സഹായകമാകും'; ISS യാത്രാനുഭവം പങ്കുവച്ച് ശുഭാൻഷു ശുക്ല

അന്താരാഷ്ട്ര ബഹിരാകാശ നിലയത്തിലേക്കുള്ള തന്റെ യാത്രാനുഭവം പങ്കുവച്ച് ഇന്ത്യൻ വ്യോമസേന ഗ്രൂപ്പ് ക്യാപ്റ്റൻ ശുഭാൻഷു ശുക്ല. തന്റെ അനുഭവങ്ങൾ ഇന്ത്യയുടെ ആദ്യത്തെ മനുഷ്യ ബഹിരാകാശ പദ്ധതിയായ ഗഗൻയാൻ ദൗത്യത്തിന് സഹായകമാകുമെന്ന് അദ്ദേഹം പറഞ്ഞു. സർക്കാരിനും ഐഎസ്ആർഒയ്ക്കും ദൗത്യത്തിൽ ഉൾപ്പെട്ട എല്ലാവർക്കും അദ്ദേഹം നന്ദിയും അറിയിച്ചു. ഐഎസ്ആർഒ ചെയർമാൻ വി നാരായണൻ, ഗഗൻയാൻ സംഘത്തിന്റെ ഭാഗമായ ഗ്രൂപ്പ് ക്യാപ്റ്റൻ പ്രശാന്ത് ബി നായർ എന്നിവർക്കൊപ്പം നടത്തിയ പത്രസമ്മേളനത്തിൽ സംസാരിക്കുകയായിരുന്നു അദ്ദേഹം. ദൗത്യം വിജയകരമായി നടപ്പിലാക്കാൻ വളരെയധികം പരിശ്രമിച്ച ഐഎസ്ആർഒയിലെ ആളുകൾ,സഹപ്രവർത്തകർ, ഗവേഷകർ എന്നിവരുടെ സംഭവാവന വിലമതിക്കാനാകാത്തതാണെന്നും അദ്ദേഹം പറഞ്ഞു. ദൗത്യം വിഭാവനം ചെയ്തതിനും ഒടുവിൽ അത് സാധ്യമാക്കിയതിനും ഇന്ത്യാ ഗവൺമെന്റിന് നന്ദി പറയുന്നതായും അദ്ദേഹം പറഞ്ഞു.