Sushant Singh Rajput Death | റിയ ചക്രവർത്തിക്കെതിരെ ക്രിമിനൽ കേസ് ഫയൽ ചെയ്ത് നാർകോടിക്സ് ബ്യൂറോ

നടി റിയ ചക്രവർത്തിക്കും മറ്റുള്ളവർക്കുമെതിരെ നാർകോടിക് കൺട്രോൾ ബ്യൂറോ ബുധനാഴ്ച ക്രിമിനൽ കേസ് രജിസ്റ്റർ ചെയ്തു. നിരോധിത മയക്കുമരുന്നിന്റെ ഇടപാടുമായി ബന്ധപ്പെട്ടാണ് കേസ് രജിസ്റ്റർ ചെയ്തതെന്ന് ഉദ്യോഗസ്ഥർ വ്യക്തമാക്കി.

മുംബൈ ബാന്ദ്രയിലെ ഫ്ലാറ്റിൽ ജൂൺ 14ന് ആയിരുന്നു സുശാന്ത് സിംഗ് രാജ്പുതിനെ മരിച്ച നിലയിൽ കണ്ടെത്തിയത്. സുശാന്തിന്റെ മരണവുമായി നിയമവിരുദ്ധമായ മയക്കുമരുന്ന് ഇടപാടുകൾക്ക് ബന്ധമുണ്ടെന്നാണ് കരുതുന്നത്. നിലവിൽ സി ബി ഐയും എൻഫോഴ്സ്മെന്റ് ഡയറക്ടറേറ്റും അന്വേഷിക്കുന്ന കേസിൽ മൂന്നാമത്തെ ഫെഡറൽ അന്വേഷണ ഏജൻസിയാണ് എൻ സി ബി.

അതേസമയം, 28കാരിയായ നടിക്കെതിരെയുള്ള ആരോപണങ്ങൾ അവളുടെ അഭിഭാഷകനായ സതിഷ് മനേഷിന്ദെ നിഷേധിച്ചിരുന്നു. റിയ തന്റെ ജീവിതത്തിൽ ഇന്നുവരെ മയക്കുമരുന്ന് ഉപയോഗിച്ചിട്ടില്ലെന്നും രക്തപരിശോധനയ്ക്ക് തയ്യാറാണെന്നും മനേഷിന്ദെ പറഞ്ഞിരുന്നു. കേസിലെ പ്രധാന പ്രതിയാണ് റിയ ചക്രവർത്തി. അതേസമയം, സുപ്രീംകോടതിയിൽ സമർപ്പിച്ച പരാതിയിൽ താൻ നടനുമായി ലിവ്-ഇൻ-റിലേഷൻഷിപ്പിൽ ആയിരുന്നെന്നും നടി വ്യക്തമാക്കിയിരുന്നു.