പ്രധാനമന്ത്രിയുടെ ഓഫീസ് ഇനി 'സേവാ തീർത്ഥിൽ'; സൗത്ത് ബ്ലോക്കിലെ 80 വർഷത്തെ വിലാസം മാറുന്നു

Published by:Rajesh V
news18-malayalam

Last Updated:Feb 13, 2026 12:00 PM IST

ഏകദേശം എട്ട് പതിറ്റാണ്ടായി ഡൽഹിയിലെ സൗത്ത് ബ്ലോക്ക് കേന്ദ്രീകരിച്ച് പ്രവർത്തിച്ചിരുന്ന പ്രധാനമന്ത്രിയുടെ ഓഫീസ് വെള്ളിയാഴ്ച മുതൽ പുതിയ മന്ദിരമായ 'സേവാ തീർത്ഥി'ലേക്ക് മാറുന്നു. സെൻട്രൽ വിസ്ത പദ്ധതിയുടെ ഭാഗമായാണ് അത്യാധുനിക സൗകര്യങ്ങളോടെ പുതിയ ഓഫീസ് സമുച്ചയം നിർമിച്ചിരിക്കുന്നത്.

ബ്രിട്ടീഷ് കാലഘട്ടത്തിൽ നിർമിക്കപ്പെട്ട സൗത്ത് ബ്ലോക്കിനോട് വിടപറഞ്ഞ് ഇന്ത്യൻ പ്രധാനമന്ത്രിയുടെ ഓഫീസ് പുതിയ അധ്യായത്തിലേക്ക് കടക്കുകയാണ്. വെള്ളിയാഴ്ച ഉച്ചയ്ക്ക് 1:30ഓടെ പ്രധാനമന്ത്രി നരേന്ദ്ര മോദി 'സേവാ തീർത്ഥ്' എന്ന് പേരിട്ടിരിക്കുന്ന ഈ മന്ദിര സമുച്ചയം രാജ്യത്തിന് സമർപ്പിക്കും.

എന്താണ് 'സേവാ തീർത്ഥ്'?

"സേവനത്തിന്റെ പുണ്യസ്ഥലം" എന്നാണ് ഈ പേരിന്റെ അർത്ഥം. കേവലം ഒരു ഓഫീസ് എന്നതിലുപരി ജനസേവനത്തിന് മുൻഗണന നൽകുന്ന ഭരണരീതിയുടെ പ്രതീകമായാണ് ഇതിനെ വിശേഷിപ്പിക്കുന്നത്.

പ്രധാന പ്രത്യേകതകൾ

‌മൂന്ന് മന്ദിരങ്ങൾ- പ്രധാനമന്ത്രിയുടെ ഓഫീസ് (PMO), ക്യാബിനറ്റ് സെക്രട്ടേറിയറ്റ്, നാഷണൽ സെക്യൂരിറ്റി കൗൺസിൽ സെക്രട്ടേറിയറ്റ് എന്നിവ ഒരേ സമുച്ചയത്തിൽ പ്രവർത്തിക്കും.

ഇന്ത്യാ ഹൗസ്- വിദേശ പ്രതിനിധികളുമായുള്ള ഉന്നതതല ചർച്ചകൾക്കായി അന്താരാഷ്ട്ര നിലവാരത്തിലുള്ള കോൺഫറൻസ് സൗകര്യം ഇവിടെ ഒരുക്കിയിട്ടുണ്ട്.

അത്യാധുനിക സുരക്ഷ- എൻക്രിപ്റ്റഡ് ആശയവിനിമയ സംവിധാനങ്ങൾ, സ്മാർട്ട് ആക്സസ് കൺട്രോൾ, ഗ്രീൻ ബിൽഡിംഗ് മാനദണ്ഡങ്ങൾ എന്നിവ പാലിച്ച് പരിസ്ഥിതി സൗഹൃദമായാണ് നിർമാണം.

ഏകോപനം- ചിതറിക്കിടക്കുന്ന സർക്കാർ ഓഫീസുകളെ ഒരിടത്ത് കൊണ്ടുവരുന്നതിലൂടെ ഭരണപരമായ കാര്യക്ഷമത വർധിപ്പിക്കാൻ സാധിക്കും.

ചരിത്രപരമായ മാറ്റം

1947-ൽ ജവഹർലാൽ നെഹ്‌റു മുതൽ നരേന്ദ്ര മോദി വരെ എല്ലാ പ്രധാനമന്ത്രിമാരും പ്രവർത്തിച്ചിരുന്നത് 1931ൽ ഉദ്ഘാടനം ചെയ്യപ്പെട്ട സൗത്ത് ബ്ലോക്കിലായിരുന്നു. സ്വതന്ത്ര ഇന്ത്യയുടെ ചരിത്രത്തിൽ ആദ്യമായാണ് പ്രധാനമന്ത്രിയുടെ ഓഫീസ് സൗത്ത് ബ്ലോക്കിൽ നിന്ന് മാറുന്നത്. പഴയ സൗത്ത് ബ്ലോക്ക് കെട്ടിടം മ്യൂസിയമായി മാറ്റാനാണ് തീരുമാനം.

Summary: Prime Minister Narendra Modi is set to shift his official workspace to 'Seva Teerth', a new state-of-the-art complex near Raisina Hill, ending nearly eight decades of the PMO functioning from the colonial-era South Block. Part of the Central Vista Project, Seva Teerth (meaning "Sacred Place of Service") integrates the PMO, Cabinet Secretariat, and National Security Council into one hub. The facility features modern open workspaces, the high-tech 'India House' for international summits, and 4-star green building standards.