‘എന്റെ ഭാഷയുമല്ല ശബ്ദവുമല്ല’; പാകിസ്ഥാനെ പുകഴ്ത്തിയെന്ന പേരിൽ പ്രചരിക്കുന്ന വീഡിയോ വ്യാജമെന്ന് ശശി തരൂർ

പാകിസ്ഥാൻ പ്രൊപ്പഗണ്ട സോഷ്യൽ മീഡിയ അക്കൗണ്ട് വഴിയാണ് തരൂരിന്റെ ശബ്ദത്തോട് സാമ്യമുള്ള രീതിയിൽ ക്ലോൺ ചെയ്ത വീഡിയോ പ്രചരിച്ചത്. പാകിസ്ഥാൻ നയതന്ത്രപരമായി ഇന്ത്യയെ പരാജയപ്പെടുത്തിയെന്നും ഒരു ചെറിയ രാജ്യത്തിന് പോലും മികച്ച നയതന്ത്രത്തിലൂടെ വലിയ ശക്തികളെ നേരിടാമെന്നും തരൂർ പറയുന്നതായാണ് വീഡിയോയിൽ ചിത്രീകരിച്ചിരിക്കുന്നത്. ഇന്ത്യൻ ക്രിക്കറ്റ് ബോർഡ് പാകിസ്ഥാന് മുന്നിൽ അടിയറവ് പറഞ്ഞുവെന്നും പാകിസ്ഥാന്റെ നയതന്ത്രം അഭിനന്ദനാർഹമാണെന്നും തരൂരിന്റെ ശബ്ദത്തിലുള്ള ക്ലോൺ വീഡിയോയിൽ പറയുന്നുണ്ട്.

നേരത്തെ ബിസിസിഐ വൈസ് പ്രസിഡന്റും കോൺഗ്രസ് നേതാവുമായ രാജീവ് ശുക്ലയുടേതെന്ന പേരിൽ സമാനമായ രീതിയിൽ എഐ നിർമ്മിത ഓഡിയോ ക്ലിപ്പ് പാകിസ്ഥാൻ ചാനലായ എആർവൈ ന്യൂസിൽ (ARY News) സംപ്രേക്ഷണം ചെയ്തിരുന്നു. പാകിസ്ഥാൻ ക്രിക്കറ്റ് താരം ഷോയബ് മാലിക് അവതരിപ്പിച്ച പരിപാടിയിലാണ് ഈ ഓഡിയോ പ്ലേ ചെയ്തത്. എന്നാൽ ഈ ശബ്ദം എഡിറ്റ് ചെയ്തതാണെന്നും കൃത്രിമമായി നിർമ്മിച്ചതാണെന്നും ശുക്ല പിന്നീട് വ്യക്തമാക്കിയിരുന്നു.