Chandrayaan-3| ചന്ദ്രനിൽ സൂര്യോദയം; ചന്ദ്രയാന്റെ വിളിക്ക് കാതോർത്ത് ISRO

ചന്ദ്രോപരിതലത്തിലെ കൊടുംതണുപ്പിനെ അതിജീവിക്കാൻ കഴിഞ്ഞാൽ പ്രഗ്യാൻ റോവർ വീണ്ടും പ്രവർത്തന സജ്ജമായേക്കും. റോവർ ഉറക്കം ഉണരുമോ എന്നറിയാൻ വഴിയുണ്ടെങ്കിൽ എളുപ്പമായിരുന്നു, പക്ഷേ, സൂര്യോദയത്തിനു ശേഷം സിസ്റ്റങ്ങൾ എങ്ങനെ പ്രവർത്തിക്കുമെന്ന് കാത്തിരുന്ന് തന്നെ കാണണമെന്നാണ് ഐഎസ്ആർഒ ചെയർമാൻ എസ് സോമനാഥ് ടൈംസ് ഓഫ് ഇന്ത്യയോട് പ്രതികരിച്ചത്.

ബുധനാഴ്ച്ചയാണ് ചന്ദ്രനിൽ സൂര്യോദയമുണ്ടായത്. ഇനി പതിനാല് ദിവസം പകലായിരിക്കും. എങ്കിലും, വിക്രം ലാൻഡറും പ്രഗ്യാൻ റോവറും വീണ്ടും പ്രവർത്തന സജ്ജമാകുകയാണെങ്കിൽ ഒന്ന് രണ്ട് ദിവസം കൂടി കാത്തിരിക്കേണ്ടി വന്നേക്കും. ഇതിന് സൂര്യന്റെ എലവേഷൻ ആംഗിൾ പ്രധാനമാണ്. സിസ്റ്റങ്ങൾ പ്രവർത്തിക്കാൻ ഏറ്റവും അനുയോജ്യമായ സൂര്യന്റെ എലവേഷൻ ആംഗിൾ 6° മുതൽ 9° വരെയാണ്. താപനിലയും ഒരു നിശ്ചിത പരിധിക്ക് മുകളിൽ ഉയരണം.