'ഉത്തരേന്ത്യയില്‍ സ്ത്രീകളോട് ഭര്‍ത്താവിന് എന്താണ് ജോലിയെന്ന് ചോദിക്കും; തമിഴ്‌നാട്ടില്‍ നിങ്ങളുടെ ജോലി എന്തെന്നും'; തമിഴ്‌നാട് മന്ത്രി

തമിഴ്‌നാട്ടിലെയും ഉത്തരേന്ത്യയിലെയും സ്ത്രീകളോടുള്ള സമൂഹത്തിന്റെ മനോഭാവത്തെ താരതമ്യം ചെയ്തുകൊണ്ട് തമിഴ്‌നാട് വ്യവസായമന്ത്രി ടി.ആര്‍.ബി. രാജ നടത്തിയ പരാമര്‍ശം വിവാദത്തില്‍. എത്തിരാജ് കോളേജ് ഫോര്‍ വുമനില്‍ ഒരു പരിപാടിയില്‍ പങ്കെടുത്ത് സംസാരിക്കുകയായിരുന്നു അദ്ദേഹം. ''തമിഴ്‌നാട്ടിലെ സ്ത്രീകളും മറ്റ് സംസ്ഥാനങ്ങളിലെ സ്ത്രീകളും തമ്മില്‍ ഒരു വ്യത്യാസമുണ്ട്. 100 വര്‍ഷങ്ങള്‍ക്ക് മുമ്പ് ഇന്ത്യയിലെ സ്ത്രീകളെ മനുഷ്യരായി പോലും പരിഗണിച്ചിരുന്നില്ല. ഉത്തരേന്ത്യയില്‍ ഈ സ്ഥിതി ഇപ്പോഴും മാറ്റമില്ലാതെ തുടരുകയാണ്. ഉത്തരേന്ത്യയില്‍ നമ്മള്‍ ഒരു സ്ത്രീയെ കാണുമ്പോള്‍ ആദ്യത്തെ ചോദ്യം നിങ്ങളുടെ ഭര്‍ത്താവ് എവിടെയാണ് ജോലി ചെയ്യുന്നത് എന്നതാണ്. തമിഴ്‌നാട്ടിലാകട്ടെ, നിങ്ങള്‍ എവിടെയാണ് ജോലി ചെയ്യുന്നത് എന്നാണ് ചോദിക്കുക. ഈ മാറ്റം ഒരു രാത്രി കൊണ്ട് സംഭവിക്കുന്നതല്ല. ഇതിനായി തമിഴ്‌നാട്ടില്‍ കുറഞ്ഞത് ഒരു നൂറ്റാണ്ട് കാലത്തെ പരിശ്രമം ആവശ്യമായി വന്നു,'' അദ്ദേഹം പറഞ്ഞു.