പൂനെയിലെ ശനിവാർ വാഡ കോട്ടയിൽ‌ നിസ്കരിച്ചതിന് 3 മുസ്ലിം സ്ത്രീകള്‍ക്കെതിരെ കേസെടുത്തു

ഈ സംഭവം മഹാരാഷ്ട്രയിലെ ഭരണ സഖ്യകക്ഷികൾക്കിടയിൽ ഭിന്നതയുണ്ടാക്കുകയും പുതിയ രാഷ്ട്രീയ വിവാദത്തിന് തിരികൊളുത്തുകയും ചെയ്തു. നാഷണലിസ്റ്റ് കോൺഗ്രസ് പാർട്ടി (അജിത് പവാർ വിഭാഗം) ബിജെപി നേതാവ് മുരളീധർ മോഹോളിനെയും പ്രാദേശിക എംഎൽഎ സിദ്ധാർത്ഥ് ഷിരോളെയുടെ സഹായിയായ കുൽക്കർണിയെയും പ്രദേശത്ത് ശുദ്ധികലശം നടത്തിയതിലൂടെ വിഷയത്തെ വർഗ്ഗീയവൽക്കരിക്കാൻ ശ്രമിച്ചുവെന്ന് ആരോപിക്കുകയും കുൽക്കർണിക്കെതിരെ കേസ് എടുക്കണമെന്ന് ആവശ്യപ്പെടുകയും ചെയ്തു.

ശനിയാഴ്ച ഉച്ചയ്ക്ക് 1.45 ഓടെയാണ് സംഭവം നടന്നതെന്നാണ് റിപ്പോർട്ട്. ഇതിനുശേഷം ആർക്കിയോളജിക്കൽ സർവേ ഓഫ് ഇന്ത്യ (എഎസ്ഐ) ഉദ്യോഗസ്ഥൻ പൂനെ സിറ്റി പോലീസിൽ ഔദ്യോഗികമായി പരാതി നൽകി.

വൈറൽ വീഡിയോയെത്തുടർന്ന് ഞായറാഴ്ച ബിജെപി എംപി മേധ കുൽക്കർണിയുടെയും ഒരു പ്രാദേശിക വലതുപക്ഷ സംഘടനയിലെ അംഗങ്ങളുടെയും പ്രതിഷേധം ഉണ്ടായി. ഇവർ നമസ്കാരം നടന്ന സ്ഥലത്ത് "ശുദ്ധീകരണ" ചടങ്ങുകളും നടത്തി. ഇതിനെത്തുടർന്ന് ശനിവാർ വാഡ പരിസരത്ത് പോലീസ് സുരക്ഷ വർധിപ്പിച്ചു.

"സംരക്ഷിത സ്മാരകങ്ങളിൽ നിരോധിത പ്രവർത്തനങ്ങൾ നടത്തുന്നതിനുള്ള പിഴകൾ വ്യവസ്ഥ ചെയ്യുന്ന AMASR നിയമങ്ങളിലെ ബന്ധപ്പെട്ട വകുപ്പാണ് ഞങ്ങൾ ചുമത്തിയിരിക്കുന്നത്," ഒരു പോലീസ് ഉദ്യോഗസ്ഥൻ പറഞ്ഞു.

വിവാദത്തോട് പ്രതികരിച്ച മഹാരാഷ്ട്രാ മന്ത്രി നിതേഷ് റാണെ, ശനിവാർ വാഡ ഹിന്ദു വീര്യത്തിൻ്റെ പ്രതീകവും സമൂഹത്തിൻ്റെ ഹൃദയത്തോട് ചേർന്നുള്ളതുമാണ് എന്ന് പറഞ്ഞു. സ്ത്രീകൾ നമസ്കരിക്കുന്നതിൻ്റെ വൈറൽ വീഡിയോയും തുടർന്നുണ്ടായ ശുദ്ധീകരണവും പരാമർശിച്ചുകൊണ്ട്, ഹിന്ദുക്കളെ ഹാജി അലിയിൽ ഹനുമാൻ ചാലിസ ചൊല്ലാൻ മുസ്ലിം സമൂഹം അനുവദിക്കുമോ എന്നും റാണെ ചോദിച്ചു.

"ശനിവാർ വാഡയ്ക്ക് ഒരു ചരിത്രമുണ്ട്. അത് നമ്മുടെ വീര്യത്തിൻ്റെ പ്രതീകമാണ്. അത് ഹിന്ദു സമൂഹത്തിൻ്റെ ഹൃദയത്തോട് വളരെ ചേർന്നുനിൽക്കുന്നതാണ്. നിങ്ങൾക്ക് അവിടെ നമസ്കരിക്കണമെങ്കിൽ, ഹിന്ദുക്കൾ ഹാജി അലിയിൽ പോയി ഹനുമാൻ ചാലിസ ചൊല്ലുന്നത് നിങ്ങൾക്ക് സമ്മതമാകുമോ? നിങ്ങളുടെ വികാരങ്ങൾ വ്രണപ്പെടില്ലേ? ... നിശ്ചയിക്കപ്പെട്ട സ്ഥലങ്ങളിൽ മാത്രമേ ഒരാൾ പ്രാർത്ഥനകൾ നടത്താവൂ. ഹിന്ദു പ്രവർത്തകർ ശബ്ദമുയർത്തിയെങ്കിൽ, അത് ശരിയാണ്," അദ്ദേഹം എഎൻഐയോട് പറഞ്ഞു.