പ്രണയത്തിന് എന്ത് ലോക്ക്ഡൗൺ: കാമുകനെ വിവാഹം ചെയ്യാൻ യുവതി നടന്നെത്തിയത് 60 കിലോമീറ്റർ

അടുത്ത ഗ്രാമത്തിൽ താമസിക്കുന്ന കാമുകനായ യുവാവിന്‍റെ അരികിലെത്താൻ 19 കാരിയായ യുവതി നടന്നത് 60 കിലോമീറ്റർ. ആന്ധ്രാപ്രദേശിലാണ് സംഭവം. കൃഷ്ണ ജില്ലയിലെ താമസക്കാരിയായ ചിട്ടികല ഭവാനി (19) എന്ന പെൺകുട്ടിയും അയൽഗ്രാമമായ എടപ്പള്ളിയിലെ സായ് പുന്നയ്യ എന്ന യുവാവും തമ്മിൽ കഴിഞ്ഞ നാല് വർഷമായി പ്രണയത്തിലായിരുന്നു. അടുത്ത സമയത്ത് വീട്ടുകാർ വിവരം അറിഞ്ഞതോടെ പ്രശ്നങ്ങൾ ആരംഭിച്ചു. ഇതേത്തുടർന്നാണ് ഇരുവരും ഒളിച്ചോടാൻ തീരുമാനിച്ചത്.

എന്നാൽ യുവതിയുടെ വീട്ടുകാരും വെറുതെയിരുന്നില്ല. ഇവർ ഭീഷണി തുടങ്ങിയതോടെ നവദമ്പതികള്‍ പൊലീസ് സഹായം തേടി. രണ്ട് പേരും പ്രായപൂർത്തിയായതിനാൽ ബന്ധുക്കളെ പൊലീസ് കൗൺസിലിംഗിനായി വിളിച്ചു.

'ഇക്കഴിഞ്ഞ ദിവസമാണ് നവദമ്പതികൾ ഞങ്ങളുടെ പക്കൽ സംരക്ഷണം തേടിയെത്തിയത്. വിവരങ്ങൾ ചോദിച്ചറിഞ്ഞപ്പോൾ ആ പെൺകുട്ടി കിലോമീറ്ററുകളോളം നടന്നാണ് കാമുകനായ യുവാവിനെ വിവാഹം ചെയ്യാനെത്തിയതെന്ന് മനസിലായി' എന്നായിരുന്നു പൊലീസുകാരുടെ പ്രതികരണം. 'പെൺകുട്ടിയെ കാണാനില്ലെന്ന് കാട്ടി വീട്ടുകാരും പരാതി നൽകിയിട്ടുണ്ട്. എന്നാൽ വിവാഹിതരായവർ പ്രായപൂർത്തിയായവർ ആയതിനാൽ പെൺകുട്ടിയുടെ വീട്ടുകാർക്ക് കൗൺസിലിംഗ് നടത്തി വരികയാണ് എന്നും അവർ കൂട്ടിച്ചേർത്തു..'

'ലോക്ക് ഡൗണിന് ശേഷം വിവാഹം മതിയെന്ന് ചിന്തിച്ചതാണ്. എന്നാൽ നിലവിലെ സാഹചര്യത്തിൽ ലോക്ക്ഡൗൺ സർക്കാർ നീട്ടുമെന്നാണ് തോന്നുന്നത്... അതുകൊണ്ട് ഇനിയും കാത്തിരിക്കാനായില്ല.. ഞാൻ നടന്ന് പുന്നയ്യയുടെ അരികിലെത്തി.. ' എന്നായിരുന്നു ഭവാനിയുടെ വാക്കുകള്‍.