Yahiya Thangal | 'ജഡ്ജിമാരുടെ അടിവസ്ത്രത്തിന്റെ നിറം കാവി'; യഹിയ തങ്ങള്‍ക്കെതിരെ കോടതിയലക്ഷ്യത്തിന് അനുമതി തേടി

ഹൈക്കോടതി ജഡ്ജിമാര്‍ക്കെതിരെയുള്ള വിവാദ പരാമര്‍ശത്തില്‍ പൊലീസ് കേസെടുത്തിരുന്നു. ആലപ്പുഴ എസ് പി ഓഫീസ് മാര്‍ച്ചിനിടെയാണ് ഇയാള്‍ ഹൈക്കോടതി ജഡ്ജിയെ അധിഷേപിച്ച് സംസാരിച്ചത്. ഹൈക്കോടതി ജഡ്ജിമാരുടെ അടിവസ്ത്രത്തിന്റെ നിറം കാവിയാണെന്നായിരുന്നു യഹിയ തങ്ങളുടെ പ്രസ്താവന. കൂടാതെ മതവിദ്വേഷ പ്രസംഗത്തില്‍ പി.സി.ജോര്‍ജിന് ജാമ്യം നല്‍കിയ ജഡ്ജി പി.എസ്. ശ്രീധരന്‍ പിള്ളയുടെ ജൂനിയറായിരുന്നു എന്നും  അധിക്ഷേപിച്ചിരുന്നു.

പ്രസ്താവന വാര്‍ത്തയായതിന് പിന്നാലെ ആലപ്പുഴ സൗത്ത് പൊലീസ് സ്വമേധയാ കേസ് എടുക്കുകയായിരുന്നു. പോപ്പുലര്‍ ഫ്രണ്ട് റാലിയിലെ വിദ്വേഷ പ്രസംഗ കേസില്‍ റിമാന്‍ഡില്‍ കഴിയുകയാണ് യഹിയ. ജൂണ്‍ പതിമൂന്ന് വരെയാണ് റിമാന്‍ഡ് ചെയ്തിരിക്കുന്നത്. തൃശൂര്‍ സ്വദേശി ആയതിനാല്‍ കാക്കനാട് സബ് ജയിലിലേക്ക് മാറ്റണമെന്ന യഹിയയുടെ ആവശ്യം കോടതി അംഗീകരിച്ചില്ല.

കഴിഞ്ഞദിവസമാണ് വിദ്വേഷ മുദ്രാവാക്യം വിളിച്ച കേസില്‍ യഹിയ തങ്ങളെ തൃശ്ശൂര്‍ കുന്നംകുളത്ത് വെച്ച് ആലപ്പുഴ പൊലീസ് അറസ്റ്റ് ചെയ്തത്. ആലപ്പുഴയില്‍ നടന്ന പോപ്പുലര്‍ ഫ്രണ്ട് സമ്മേളനത്തിന്റെ ചെയര്‍മാനായിരുന്നു യഹിയ തങ്ങള്‍.

റാലിയില്‍ കുട്ടിയുടെ വിവാദ മുദ്രാവാക്യം വിളിയില്‍ ശക്തമായ നടപടി വേണമെന്നും റാലി നടത്തിയ സംഘാടകര്‍ക്കെതിരെ നടപടി വേണമെന്നും ഹൈക്കോടതി നിര്‍ദ്ദേശിച്ചിരുന്നു. റിലിക്കിടെ വിദ്വേഷ മുദ്രാവാക്യം വിളിച്ച കേസില്‍ ഇതുവരെ 26 പേരാണ് അറസ്റ്റിലായത്.