SDPI നേതാക്കൾ AKG സെന്റർ സന്ദർശിച്ചെന്ന SDPI വാദം വസ്തുതാപരമല്ല; AKG സെന്റർ
- Published by:Rajesh V
- news18-malayalam
Last Updated:
''ഓഫീസിന് ഉള്ളിലേക്ക് കടത്താതെ മടക്കി അയച്ചിട്ടും എകെജി സെന്റര് സന്ദര്ശിച്ചു എന്ന തരത്തില് എസ്ഡിപിഐ സ്വയം പ്രചരണം നടത്തുന്നത് മറ്റെന്തോ ഗൂഢ ലക്ഷ്യം ഉള്ളില് വച്ചാണ്''
തിരുവനന്തപുരം: എസ്ഡിപിഐ നേതാക്കൾ എകെജി സെന്റർ സന്ദർശിച്ചെന്ന വാദം വസ്തുതാപരമല്ലെന്ന് എകെജി സെന്റർ വിശദീകരണക്കുറിപ്പിൽ അറിയിച്ചു. എസ്ഡിപിഐ നേതാക്കളെ മടക്കി അയക്കുകയായിരുന്നുവെന്നും പുറത്തിറങ്ങിയ അവര് എകെജി സെന്ററിന് മുന്നിൽ നിന്ന് ഫോട്ടോ എടുത്ത് സമൂഹ മാധ്യമങ്ങളിൽ പ്രചരിപ്പിച്ചുവെന്നും കുറിപ്പിൽ പറയുന്നു. ചില മാധ്യമങ്ങൾ അതേറ്റെടുത്ത് വാർത്ത പ്രസിദ്ധീകരിക്കാനും തയാറെന്ന് എകെജി സെന്റർ കുറ്റപ്പെടുത്തുന്നു. 'എസ്ഡിപിഐ പോലുള്ള വര്ഗ്ഗീയ കക്ഷികളുമായി ഒരു തരത്തിലുള്ള കൂടികാഴ്ചയും പാർട്ടി ആഗ്രഹിക്കുന്നില്ല എന്നതിന്റെ അടിസ്ഥാനത്തിലാണ് അവരെ മടക്കിഅയച്ചത്. ഓഫീസിന് ഉള്ളിലേക്ക് കടത്താതെ മടക്കി അയച്ചിട്ടും എകെജി സെന്റര് സന്ദര്ശിച്ചു എന്ന തരത്തില് എസ്ഡിപിഐ സ്വയം പ്രചരണം നടത്തുന്നത് മറ്റെന്തോ ഗൂഢ ലക്ഷ്യം ഉള്ളില് വച്ചാണ്. അത്തരത്തില് തെറ്റിദ്ധാരണ പരത്തി മുതലെടുക്കാനുള്ള ശ്രമം വിലപ്പോകില്ല.'- വിശദകരണക്കുറിപ്പിൽ പറയുന്നു.
എ കെ ജി സെന്റര് പുറത്തിറക്കിയ കുറിപ്പിന്റെ പൂർണരൂപം
ബോംബ് ആക്രമണത്തിന് ശേഷം എസ്.ഡി.പി.ഐ സംഘം എ.കെ.ജി സെന്റര് സന്ദര്ശിച്ചു എന്ന തരത്തില് ഒരു വാര്ത്തയും ചിലര് എ.കെ.ജി സെന്ററിന് മുന്നില് നില്ക്കുന്ന ഒരു ചിത്രവും നവമാധ്യമങ്ങളില് പ്രചരിക്കുന്നത് ശ്രദ്ധയില്പ്പെട്ടു. ഇത് വസ്തുതാപരമല്ല. എസ്.ഡി.പി.ഐ ഭാരവാഹികളെന്ന് പരിചയപ്പെടുത്തിയ ഏഴ് അംഗ സംഘം ജൂലൈ 1 ന് 5 മണിയോടെ താഴത്തെ നിലയിലെ സെക്യൂരിറ്റിയുടെ അടുത്തുവന്നു. പാര്ടി നേതാക്കന്മാരെ കാണണം എന്ന് ആവശ്യപ്പെട്ടു. എന്നാല് എസ്.ഡി.പി.ഐയുമായി കൂടി കാഴ്ച നടത്താന് പാര്ടിക്ക് താല്പര്യമില്ല എന്നറിയിച്ച് മടക്കിവിടുകയാണ് ചെയ്തത്. അഞ്ച് മിനിട്ടിലധികം കാത്തിരുന്നിട്ടും നേതാക്കളെ കാണാനാകില്ല എന്ന കര്ശന നിലപാട് എടുത്തതോടെയാണ് അവര് മടങ്ങിയത്. പുറത്ത് ഇറങ്ങിയ അവര് എ.കെ.ജി സെന്ററിന് മുന്നില് നിന്ന് ഫോട്ടോ എടുത്ത് സമൂഹ മാധ്യമങ്ങളില് പ്രചരിപ്പിച്ചു. അത് ഏറ്റെടുത്ത് ചില മാധ്യമങ്ങള് വാര്ത്ത പ്രസിദ്ധീകരിക്കാനും തയ്യാറായി. ഇത് പൂര്ണ്ണമായും കളവാണ്.
advertisement
സി.പി.ഐ.(എം) ന്റെ സംസ്ഥാന കമ്മിറ്റി ഓഫീസ് പ്രവര്ത്തിക്കുന്ന എ.കെ.ജി സെന്റര് പൊതുജനങ്ങള്ക്ക് എപ്പോഴും പ്രവേശനമുള്ള സ്ഥലമാണ്. സാധാരണക്കാരായ ലക്ഷക്കണക്കിന് ആളുകളുടെ ആശ്രയ കേന്ദ്രം എന്ന നിലയിലാണ് മഹാനായ എ.കെ.ജിയുടെ പേരിലുള്ള ഈ സ്ഥാപനം പ്രവര്ത്തിക്കുന്നത്. അവിടെ കടന്നുവരുന്നതിന് ഒരു വിലക്കും ആര്ക്കും ഏര്പ്പെടുത്തിയിട്ടില്ല. പക്ഷെ എസ്.ഡി.പി.ഐ പോലുള്ള വര്ഗ്ഗീയ കക്ഷികളുമായി ഒരു തരത്തിലുള്ള കൂടികാഴ്ചയും പാര്ടി ആഗ്രഹിക്കുന്നില്ല എന്നതിന്റെ അടിസ്ഥാനത്തിലാണ് അവരെ മടക്കിഅയച്ചത്. ഓഫീസിന് ഉള്ളിലേക്ക് കടത്താതെ മടക്കി അയച്ചിട്ടും എ.കെ.ജി സെന്റര് സന്ദര്ശിച്ചു എന്ന തരത്തില് എസ്.ഡി.പി.ഐ സ്വയം പ്രചരണം നടത്തുന്നത് മറ്റെന്തോ ഗൂഢ ലക്ഷ്യം ഉള്ളില് വച്ചാണ്. അത്തരത്തില് തെറ്റിദ്ധാരണ പരത്തി മുതലെടുക്കാനുള്ള ശ്രമം വിലപ്പോകില്ല. സി.പി.ഐ.(എം) ഉയര്ത്തിപ്പിടിക്കുന്ന രാഷ്ട്രീയം ജനങ്ങള്ക്ക് പൂര്ണ്ണമായും വ്യക്തമാണെന്നിരിക്കെ ഇത്തരം ശ്രമങ്ങളെ അവജ്ഞയോടെ തള്ളിക്കളയും എന്ന് ഉറപ്പാണ്. ഒരു പരിശോധനയും കൂടാതെ ഇത്തരം പ്രചരണങ്ങള് ഏറ്റെടുത്ത് വാര്ത്ത കൊടുക്കുന്ന മാധ്യമങ്ങള് ഫലത്തില് ഇത്തരക്കാരുടെ ദുരുദ്ദേശത്തെ പിന്തുണയ്ക്കുകയാണ് ചെയ്യുന്നതെന്നും സംസ്ഥാന കമ്മിറ്റി ഓഫീസ് അറിയിച്ചു.
Click here to add News18 as your preferred news source on Google. ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
First Published :
Jul 04, 2022 2:15 PM IST
മലയാളം വാർത്തകൾ/ വാർത്ത/Kerala/
SDPI നേതാക്കൾ AKG സെന്റർ സന്ദർശിച്ചെന്ന SDPI വാദം വസ്തുതാപരമല്ല; AKG സെന്റർ
