മഴ കൊണ്ട് മാത്രം വളരുന്ന വാർത്തകൾ! വ്യാജവാർത്തയ്ക്ക് എതിരെ നടപടി വരുമെന്ന് കളക്ടർമാർ

സംസ്ഥാനത്ത് വിവിധയിടങ്ങളിൽ കനത്ത മഴ തുടരുകയാണ്. ഈ സാഹചര്യം മുൻനിർത്തി വിവിധ ജില്ലകളിലെ കളക്ടർമാർ നിലവിലെ സാഹചര്യം കണക്കിലെടുത്ത് വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിക്കുന്നുണ്ട്. എന്നാൽ കളക്ടർമാരുടെ അറിയിപ്പ് വരുന്നതിന് മുന്നേ തന്നെ പല ജില്ലകളിലും സ്കൂൾ അവധി സംബന്ധിച്ച് വ്യാജ വാർത്തകൾ പ്രചരിക്കുകയാണ്. ഇതിനെതിരെ കർശന നടപടി സ്വീകരിക്കുമെന്ന് അറിയിച്ചിരിക്കുകയാണ് കളക്ടർമാർ. കണ്ണൂർ, മലപ്പുറം ജില്ലയിലെ കളക്ടർമാരാണ് വ്യാജ വാർത്തകൾക്കെതിരെ മുന്നറിയിപ്പ് നൽകിയിരിക്കുന്നത്. സോഷ്യൽ മീഡിയയിലും വാട്സാപ്പ് മെസേജുകളിലുമാണ് സ്കൂൾ അവധി സംബന്ധിച്ച് വ്യാജവാർത്തകൾ പ്രചരിക്കുന്നത്. ഇതിനെതിരെ കർശന നടപടിയുണ്ടാകുമെന്നാണ് ബന്ധപ്പെട്ട അധികാരികൾ അറിയിച്ചിരിക്കുന്നത്.