ഇതാണാ 'മാന്യൻ'; വിമാനത്തിലുണ്ടായ മോശം അനുഭവം തുറന്നുപറഞ്ഞ് പ്രവാസി യുവതി

തിരുവനന്തപുരം: ദോഹയിൽ നിന്ന് തിരുവനന്തപുരത്തേക്ക് വന്ന ഖത്തർ എയർവേസ് വിമാനത്തിൽ വച്ചുണ്ടായ മോശം അനുഭവം തുറന്നുപറഞ്ഞ് രംഗത്തെത്തിയിരിക്കുകയാണ് പ്രവാസി യുവതി ദിവ്യ ജോസഫ്. വിമാനത്തിൽ നിന്നിറങ്ങുന്നതിനിടെ ഒരു മധ്യവയസ്കനാ‌ണ് ദിവ്യയോട് മോശമായി പെരുമാറിയത്. കാഴ്ച്ചയിൽ മധ്യവയസ്കനായ ഒരു 'മാന്യൻ' വാഷ്‌റൂമിൽ നിന്ന് സ്വന്തം ഇരിപ്പിടത്തിലേക്ക് എന്ന വ്യാജേനെ പിന്നിൽ നിന്ന് വരികയും പൊതു ഞരമ്പൻ സ്വഭാവത്തെ അനുസ്‌മരിപ്പിക്കുകയും ചെയ്തുവെന്നാണ് ദിവ്യ പറയുന്നത്. ബാഗ് കൊണ്ട് പ്രതിരോധിച്ചപ്പോള്‍ അയാള്‍ വീണ്ടും മോശമായി പെരുമാറിയെന്നും ഉറക്കെ പ്രതികരിച്ചപ്പോള്‍ സ്ഥലത്ത് നിന്ന് രക്ഷപ്പെട്ടെന്നും ദിവ്യ ഫേസ്ബുക്കിൽ കുറിച്ചു. ഉറക്കെ പ്രതികരിച്ചപ്പോള്‍ അവിടെയുണ്ടായിരുന്ന പുരുഷാരം പ്രതികരിക്കാത്തത് വേദനയുണ്ടാക്കിയെന്നും അവർ പറയുന്നു. മോശം പെരുമാറ്റം നടത്തിയ ആളിന്റെ ഫോട്ടോ സഹിതമാണ് ദിവ്യ ഫേസ്ബുക്കിൽ പ്രതികരിച്ചിരിക്കുന്നത്.