Higher Secondary | പുതുക്കിയ ഉത്തരസൂചിക റെഡി; പ്ലസ് ടു കെമിസ്ട്രി പരീക്ഷാ മൂല്യനിര്‍ണയം ഇന്ന് മുതല്‍

ഉത്തരസൂചിക യിലെ അപാകത പരിഹരിച്ച സാഹചര്യത്തിൽ മൂല്യനിർണയ ബഹിഷ്കരണത്തിൽ നിന്ന് അധ്യാപകർ പിന്മാറി. നേരത്തെയുണ്ടായിരുന്ന ഉത്തരസൂചിക കളിൽ അപാകത കണ്ടെത്തിയ സാഹചര്യത്തിൽ അധ്യാപകർക്ക് എതിരായ നടപടി പിൻവലിക്കണമെന്ന് ഹയർസെക്കൻഡറിയിലെ  പ്രതിപക്ഷ അധ്യാപക സംഘടനകൾ ആവശ്യപ്പെട്ടു.

ഇത്തവണത്തെ പ്ലസ് ടു കെമിസ്ട്രി മൂല്യനിർണയത്തിന് നൽകിയ ചോദ്യകർത്താവിന്റെ ഉത്തരസൂചിക യിൽ അപാകതയുണ്ടെന്ന് ആരോപിച്ച്  അധ്യാപകർ മൂല്യനിർണയം ബഹിഷ്കരിച്ചത് വിവാദമായിരുന്നു. ഈ സാഹചര്യത്തിലാണ് ഉത്തരസൂചിക പുതുക്കാൻ വിദ്യാഭ്യാസ വകുപ്പ് തീരുമാനിച്ചത്. ചോദ്യകർത്താവ്, അധ്യാപക സമിതി എന്നിവർ തയ്യാറാക്കിയ ഉത്തരസൂചികകൾ വച്ച്  പുതിയൊരു ഉത്തരസൂചികക്ക് രൂപം നൽകാനായിരുന്നു തീരുമാനം . ഇതിനായി വിഷയ വിദഗ്ധരടങ്ങിയ 15 അംഗ സമിതി  യോഗം ചേർന്നു.

പുതിയ ഉത്തരസൂചികയുടെ  അടിസ്ഥാനത്തിലാകും ഇന്ന്  മുതലുള്ള മൂല്യനിർണയം, ഇതുവരെ  നോക്കിയ പേപ്പറുകൾ വീണ്ടും മൂല്യനിർണയം  നടത്തും. അധ്യാപകർ മൂല്യനിർണയ ബഹിഷ്കരിച്ചത് സംബന്ധിച്ച് വിദ്യാഭ്യാസ വകുപ്പ് പ്രിൻസിപ്പൽ സെക്രട്ടറി മുഹമ്മദ് ഹനീഷ് അന്വേഷണം നടത്തും. വിദ്യാർഥികളിൽ മാനസിക സംഘർഷമുണ്ടാക്കുന്ന വ്യാജ വാർത്തകൾ അധ്യാപകർ പ്രചരിപ്പിക്കുകയാണ്. ഇതിന്റെ ഉറവിടം സംബന്ധിച്ച് അന്വേഷിക്കും.ബഹിഷ്കരണത്തിന് മുൻപെ സമരാന്തരീക്ഷം സൃഷ്ടിച്ചുവെന്നും  ഒരു വിഭാഗം അധ്യാപകസംഘടനകൾ  സർക്കാർ വിരുദ്ധ പ്രവർത്തനങ്ങൾ നടത്തുകയാണെന്നും വിദ്യാഭ്യാസ മന്ത്രി കുറ്റപ്പെടുത്തി.

വാശി പിടിച്ച് ഫലപ്രഖ്യാപനം വൈകിപ്പിക്കാൻ സർക്കാരില്ല. മൂല്യനിർണയത്തിലെ പ്രശ്നങ്ങൾ ഫല പ്രഖ്യാപനത്തെ ബാധിക്കില്ല. ഫലപ്രഖ്യാപനം വന്നശേഷം കൂടുതൽ കാര്യങ്ങൾ പറയുമെന്നും വിദ്യാഭ്യാസ മന്ത്രി വ്യക്തമാക്കി.