തളിർക്കുമോ കൊഴിയുമോ രണ്ടില? ജോസ് കെ മാണിയുടെ രാഷ്ട്രീയ ഭാവി നിർണയിക്കുന്ന തിരഞ്ഞെടുപ്പ്

പിളരാതെ പാർട്ടിയെ നിലനിർത്തുന്നതിലും അധികാരം നിലനിർത്തുന്നതിലും വിജയിച്ചു എങ്കിലും സ്വന്തം വിജയം ഉറപ്പാക്കുന്നതിൽ ആ മികവ് തെളിയിക്കാൻ ജോസിനായില്ല. പാലയ്ക്ക് ഒരു വിലാസമേ 2019 വരെ ഉണ്ടായിട്ടുളളു. അത് അര നൂറ്റാണ്ടിലേറെക്കാലം പാലയെ പ്രതിനിധീകരിച്ച കെ എം മാണിയാണ്. പക്ഷേ കെ എം മാണിയെ മാത്രം വിജയിപ്പിച്ച കേരള കോൺഗ്രസ് എമ്മിന്റെ അടിത്തറയായ പാലയിൽ പക്ഷേ, ജയിക്കാൻ ജോസിനായില്ല. കേരളമാകെ ഇടതു തരംഗം ആഞ്ഞടിക്കുകയും ഇടതു മുന്നണിയുടെ ഭാഗമായി മറ്റിടങ്ങളിൽ മത്സരിച്ച കേരള കോൺഗ്രസുകാർ പലരും വിജയിച്ചിട്ടും പാർട്ടിയു​ടെ എക്കാലത്തെയും വലിയ കോട്ടയായ പാലയിൽ ജോസ് കാലിടറി വീണു. അവസാന കാലങ്ങളിൽ ഭൂരിപക്ഷം വല്ലാതെ കുറഞ്ഞെങ്കിലും കൊടുങ്കാറ്റും പേമാരിയും വന്നിട്ടും മാണിയും പാലയും ഒരിക്കലും കോർത്ത കൈ അഴിച്ചിട്ടില്ല എന്നോർക്കണം. പാലായിലെ പരാജയത്തിന്റെ ആഴം അത്രത്തോളം വലുതായിരുന്നു.

പാലായിൽ ജയിക്കാനായിരുന്നു എങ്കിൽ കേരള കോൺഗ്രസ് എം പ്രതിനിധിയായി മന്ത്രിസഭയിൽ ആരെന്ന ചോദ്യം തന്നെ ഉയരുമായിരുന്നില്ല. പകരക്കാരനായ റോഷി അഗസ്റ്റിനെ മന്ത്രിയാക്കിയപ്പോൾ കേരള കോൺഗ്രസുകളുടെ ചരിത്രം വച്ച് ക്രമേണ പാർട്ടി നേതൃത്വം റോഷിയിലേക്ക് മാറാനുളള സാധ്യത അത്ര വലുതായിരുന്നു. പക്ഷേ അവിടെയും കാര്യമായ പരിക്കില്ലാതെ പിടിച്ചു നിൽക്കാൻ ജോസിനായി. അടുത്തിടെ യു ഡി എഫ് പാളയത്തിലേക്കുളള മടക്കം മുടക്കിയത് റോഷിയാണെന്നത് പരസ്യമായ രഹസ്യമാണെങ്കിലും പാർട്ടിയിൽ തന്റെ മേധാവിത്വം ഉറപ്പിച്ചു നിർത്താനും ജോസിനായി.

ഇടതു മുന്നണിക്ക് മൂന്നാം ഊഴം ലഭിക്കുകയും ജോസ് കെ മാണി പാലയിൽ നിന്ന് ജയിക്കുകയും ചെയ്താൽ വരുന്ന മന്ത്രിസഭയിൽ പ്രധാന വകുപ്പുകളിൽ ഒന്നിന്റെ ചുമതലയുളള മന്ത്രിയാവും. ഒപ്പം കേരള രാഷ്ട്രീയത്തിലെയും മധ്യ കേരളത്തിലെയും കേരളമാകെയുള്ള ക്രൈസ്തവ വിഭാഗത്തിന് ഇടയിലെയും ഏറ്റവും കരുത്തനായ നേതാവായി ജോസ് കെ മാണി മാറും. ഏറ്റവും കൂടുതൽ ആഗ്രഹിക്കുന്നതും സാധ്യമാകണേ എന്ന് മുട്ടിപ്പായി പ്രാർത്ഥിക്കുകയും ചെയ്യുന്നത് ഇത്തരം ഒരു രാഷ്ട്രീയ സാധ്യത തനിക്കു മുന്നിൽ തുറന്നു കിട്ടണേ എന്നാവും. ഇടതു മുന്നണിയുടെ വമ്പൻ ജയത്തിന് അപ്പുറം കേരള കോൺഗ്രസ് എം എംഎൽ‌എമാരുടെ പിന്തുണ നിർണായകമാകുന്ന ചെറിയ ഭൂരിപക്ഷമാകും കൂടുതൽ ആഗ്രഹിക്കുക. അങ്ങനെയെങ്കിൽ ജോസിന്റെ കരുത്തും സമ്മർദശേഷിയും കൂടും.

എൽ ഡി എഫ് വീണ്ടും വിജയിച്ചാൽ പാർട്ടി എന്ന നിലയിൽ കേരള കോൺഗ്രസ് എമ്മിന്റെ ജയം കൂടിയാവും അത്. പക്ഷേ മന്ത്രിസഭയിലേക്ക് റോഷി അഗസ്റ്റിനെയോ മറ്റാരു എം എൽ എയോ നിയോഗിക്കേണ്ടി വരും. വീണ്ടും മന്ത്രിമോഹം അടച്ചു വയ്ക്കേണ്ടിയും വരും. റോഷിക്ക് ഒരു തവണ കൂടി അവസരം നൽകിയാൽ പാർട്ടിയിലെ അധികാര കേന്ദ്രം മാറുമോ എന്ന ഭയം സ്വാഭാവികമായും ഉണ്ടാകും. പക്ഷേ റോഷിയെ മാറ്റി മറ്റൊരാളെ കൊണ്ടുവരിക എന്നത് അത്ര എളുപ്പമാവില്ല. അതിനു കഴിഞ്ഞാൽ പാർട്ടി ലീഡർ എന്ന നിലയിൽ അധികാരം നിലനിർത്തി മുന്നോട്ടു പോകാനായേക്കും. പക്ഷേ അപ്പോഴും പിളർപ്പിന്റെ സാധ്യത തളളാനാവില്ല.

യു ഡി എഫിന് ഭരണം കിട്ടിയാലും പാലായിൽ ജയിക്കാനായാൽ തൽക്കാലം പിടിച്ചു നിൽക്കാം. ഒപ്പം മറ്റൊരു സാധ്യതയുള്ളത് മുന്നണി മാറ്റത്തിനുള്ള തന്റെ നീക്കമായിരുന്നു ശരിയെന്ന് ബോധ്യപ്പെടുത്താനാവും. വേണമെങ്കിൽ ഈ സർക്കാർ കാലാവധിക്കിടയിൽ തന്നെ മുന്നണി മാറ്റ സാധ്യതയുമുണ്ട്.

എൽ ഡി എഫിന് ഭരണം കിട്ടാതിരിക്കുകയും പാലയിൽ ജോസ് തോൽക്കുകയും ചെയ്യുന്ന അവസ്ഥയാകും ജോസിനെ സംബന്ധിച്ച് ഏറ്റവും കനത്ത തിരിച്ചടി. നേതാവ് എന്ന നിലയിൽ വലിയ വെല്ലുവിളിയാവും പിന്നീട് നേരിടേണ്ടി വരിക. മുന്നണി മാറ്റത്തിനുള്ള തന്റെ നീക്കം പൊളിച്ചതാണ് പാർട്ടിയെ ഈ അപകടത്തിൽ എത്തിച്ചതെന്ന് ഒരു വിഭാഗത്തെ ബോധ്യപ്പെടുത്താൻ ചിലപ്പോൾ കഴിഞ്ഞേക്കും. പക്ഷേ ജോസ് കെ മാണിയുടെ നേതൃശേഷി ചോദ്യം ചെയ്യപ്പെടും. മറുപക്ഷത്ത് മോൻസും അപു ജോസഫും കരുത്തരാവുകയും മധ്യ കേരള രാഷ്ട്രീയത്തിലും ക്രൈസ്തവ രാഷ്ട്രീയത്തിലും അവർ കരുത്തരാവുകയും ജോസ് ദുർബലനാവുകയും ചെയ്യും. പിന്നീടുളള ഓരോ സമയവും പിളർപ്പിനുളള സാധ്യത ഡൊമോക്ളിസിന്റെ വാൾ പോലെ തലയ്ക്ക് മേൽ തൂങ്ങിയാടും.