ജനുവരിയിൽ കേരളത്തിൽ കുംഭമേള; തിരുനാവായ വേദിയാകും

രാജ്യത്തെ ഏറ്റവും വലിയ സന്യാസ സമൂഹമായ ജുന അഖാരയാണ് കേരളത്തിലെ കുംഭമേളയ്ക്കും നേതൃത്വം നൽകുന്നത്. ജുന അഖാരയിലെ മഹാമണ്ഡലേശ്വർ സ്വാമി ആനന്ദവനം ഭാരതി ദ ന്യൂ ഇന്ത്യന്‍ എക്‌സ്പ്രസിനോട് സ്ഥിരീകരിച്ചു. കുംഭമേളയുമായി ബന്ധപ്പെട്ട ഒരുക്കങ്ങൾ വിലയിരുത്തുന്നതിനായി അദ്ദേഹം കഴിഞ്ഞ ബുധനാഴ്ച തിരുനാവായ ക്ഷേത്രത്തിൽ സന്ദർശനം നടത്തിയിരുന്നു.

ഉത്തരേന്ത്യൻ കുംഭമേളയ്ക്ക് സമാനമായ ആഘോഷ പാരമ്പര്യമുള്ള നാടാണ് തിരുനാവായ എന്ന് സ്വാമി ആനന്ദവനം ഭാരതി ഓർമ്മിപ്പിക്കുന്നു. ചേരമാൻ പെരുമാളിന്റെ ഭരണകാലത്ത് ഇവിടെ മഹാ മഖം എന്ന പേരിൽ ഒരു ഉത്സവം നടന്നിരുന്നു. പന്ത്രണ്ട് വർഷത്തിലൊരിക്കൽ ആയിരുന്നു തിരുനാവായയിൽ മഹാ മഖം നടന്നിരുന്നത്. ഇത് യജ്ഞത്തിനും യാഗത്തിനും പുതിയ രാജാവിനെ തിരഞ്ഞെടുക്കുന്നതിനും വേദിയായി. പിന്നീടാണ് ഈ ചടങ്ങ് മാമാങ്കം എന്ന പേരിൽ ആയോധന രൂപം കൈക്കൊണ്ടത്. തമിഴ്‌നാട്ടിലെ കുംഭകോണത്തും ഈ പാരമ്പര്യം നിലനിന്നിരുന്നു.

മാമാങ്കം ചടങ്ങുകൾ തിരുനാവായയിൽ വീണ്ടും തുടങ്ങുന്നതിനുള്ള ശ്രമങ്ങൾ വർഷങ്ങൾക്ക് മുമ്പേ ആരംഭിച്ചിരുന്നു. 2016ൽ ക്ഷേത്രത്തിലെ പ്രധാന പുരോഹിതൻ ഭാരതപ്പുഴയുടെ തീരത്ത് നദീപൂജാ ചടങ്ങുകൾ നടത്തിയാണ് ഇതിന് തുടക്കം കുറിച്ചത്. കോവിഡ് കാലം ഒഴികെ ഇത് എല്ലാ വർഷവും തുടർന്നു.