പരിശീലന ഹാൾ, സ്റ്റോറേജ് മുറി; കർഷകർക്ക് ആവശ്യമായ എല്ലാ സൗകര്യങ്ങളോടും കൂടി വാഴക്കുളം കൃഷിഭവൻ

വാഴക്കുളം ഗ്രാമപഞ്ചായത്തിൽ പുതുതായി നിർമ്മിച്ച കൃഷിഭവൻ മന്ദിരത്തിൻ്റെ ഉദ്ഘാടനം മന്ത്രി പി. പ്രസാദ് നിർവഹിച്ചു. കൃഷിഭവൻ സ്മാർട്ട് ആവുക എന്നതുകൊണ്ട് ഉദ്ദേശിക്കുന്നത് കർഷകർക്ക് ലഭിക്കുന്ന സേവനങ്ങൾ സ്മാർട്ട് ആവുക എന്നതാണ് എന്ന് മന്ത്രി പറഞ്ഞു. വാഴക്കുളം ഗ്രാമപഞ്ചായത്ത് ജനകീയ ആസൂത്രണ പദ്ധതിയിൽ ഉൾപ്പെടുത്തി നിർമ്മിച്ച കൃഷിഭവനിൽ കർഷകരുടെ യോഗങ്ങളും പരിശീലനങ്ങളും നടത്തുന്നതിനുള്ള ഹാളും, വിത്തുകളും തൈകളും സൂക്ഷിക്കുന്നതിനുള്ള സ്റ്റോറേജ് മുറിയും സജ്ജീകരിച്ചിട്ടുണ്ട്. കേരളത്തിൽ സ്മാർട്ട് ആകാൻ ഒരുങ്ങുന്ന 14 കൃഷിഭവനുകളിൽ ഒന്ന് കുന്നത്തുനാട് മണ്ഡലത്തിൽ ആണെന്നും അദ്ദേഹം അറിയിച്ചു. കൃഷിയും കൃഷി രീതികളും മാറുന്നതിനനുസരിച്ച് കൃഷിഭവനും ആധുനികവൽക്കരിക്കപ്പെടണം. കൃഷിയുടെ ആനുകൂല്യം പറ്റാത്തവർ ആരുമില്ല. അതിനാൽ കർഷകർ കയറിച്ചെല്ലുന്ന ഓഫീസുകൾ അവർക്ക് വേണ്ട പരിഗണന ലഭിക്കുന്ന ഇടമാകണം.