ആലങ്ങാട് കെ.ഇ.എം. ഹൈസ്കൂളിൽ 'പച്ചത്തുരുത്ത്' നിർമ്മാണത്തിന് തുടക്കമായി

'ഒരു തൈ നടാം' ജനകീയ ക്യാമ്പിൻ്റെ ഭാഗമായി ആലങ്ങാട് കെ.ഇ.എം. ഹൈസ്കൂളിൽ പച്ചത്തുരുത്ത് നിർമ്മാണത്തിന് തുടക്കമായി. ഗ്രാമപഞ്ചായത്ത് പ്രസിഡൻ്റ് പി. എം. മനാഫ് നിർമ്മാണോദ്ഘാടനം നിർവഹിച്ചു. ആലങ്ങാട് ഗ്രാമപഞ്ചായത്ത് തൊഴിലുറപ്പ് പദ്ധതിയിൽ ഉൾപ്പെടുത്തി, ഹരിത കേരളം മിഷൻ, പറവൂർ റോട്ടറി ക്ലബ്, എന്നിവരുടെ സഹകരണത്തോടെയാണ് പദ്ധതി നടപ്പാക്കുന്നത്. ആഗോളതാപന പ്രതിഭാസത്തിൻ്റെ സ്വാധീനത്തെ ചെറുക്കാൻ കഴിയുന്ന പ്രായോഗിക ഇടപെടലാണ് പച്ചത്തുരുത്ത് നിർമ്മാണം. ഒഴിഞ്ഞുകിടക്കുന്ന പൊതു സ്വകാര്യസ്ഥലങ്ങൾ, വ്യവസായസ്ഥാപനങ്ങളിലെ തരിശുഭൂമി, മാലിന്യ നിക്ഷേപ കേന്ദ്രങ്ങൾ എന്നിവിടങ്ങളിൽ പ്രാദേശികമായി വളരുന്ന മരങ്ങൾ നട്ടുവളർത്തി ചെറുകാടുകൾ സൃഷ്ടിച്ച് പ്രാദേശിക ജൈവവൈവിധ്യം സാധ്യമാക്കുകയാണ് പച്ചത്തുരുത്ത് പദ്ധതിയുടെ ലക്ഷ്യം.