ട്രെയിൻ റിവേഴ്സിൽ വന്ന് യാത്രക്കാരെ ഇറക്കുമോ? സ്റ്റേഷനിൽ നിർത്താതെ പാഞ്ഞ നിലമ്പൂർ ട്രെയിന് സംഭവിച്ചതെന്ത് ?

കൂകിപ്പാഞ്ഞു പോയ ട്രെയിൻ പെട്ടെന്ന് എന്തോ ഓർത്ത പോലെ രണ്ട് കിലോമീറ്റർ ദൂരം മുന്നോട്ടു പോയതിനു ശേഷം റിവേഴ്സ് എടുത്ത് തിരിച്ചുവന്ന് യാത്രക്കാരെ ഇറക്കുകയായിരുന്നു. എന്താണ് സംഭവിച്ചതെന്ന് യാത്രക്കാർക്കും അറിയില്ല. ട്രെയിൻ നിർത്താതെ പോകുന്നത് കണ്ടപ്പോൾ തുവ്വൂരിൽ ഇറങ്ങേണ്ട യാത്രക്കാർ ബഹളമുണ്ടാക്കാനും തുടങ്ങി. ആദ്യമായാണ് ഒരു ട്രെയിൻ പുറകോട്ടെടുത്ത് യാത്രക്കാരെ കയറ്റുകയും ഇറക്കുകയും ചെയ്യുന്നത് കാണ്ടത് എന്നാണ് യാത്രക്കാരിൽ പലരും പറയുന്നത്.

ട്രെയിൻ നിർത്താതെ പോകുന്നതു കണ്ട് യാത്രക്കാരെ കൂട്ടാൻ വന്ന പലരും അടുത്ത സ്റ്റേഷനായ വാണിയമ്പലത്തേക്ക് പുറപ്പെട്ടു. പകുതി ദൂരം എത്തിയപ്പോഴാണ് ട്രെയിൻ പുറകോട്ടു പോയി തുവ്വൂരിൽ നിർത്തിയ കാര്യം അറിയുന്നത്. വാണിയമ്പലത്തേക്ക് പോയവർ വീണ്ടും തുവ്വൂരിലേക്ക് മടങ്ങുകയായിരുന്നു.