കോട്ടയം ജില്ലയിലെ ഏറ്റവും ഉയർന്ന കൊടുമുടിയായ ഇല്ലിക്കൽ കല്ല് 

കോട്ടയം ജില്ലയിലെ ഏറ്റവും ഉയർന്ന കൊടുമുടികളിൽ ഒന്നാണ് ഇല്ലിക്കൽ കല്ല്. സമുദ്രനിരപ്പിൽ നിന്ന് നാലായിരം അടി ഉയരത്തിലാണ് ഇല്ലിക്കൽ കല്ല് സ്ഥിതി ചെയ്യുന്നത്. മൂന്നു പാറക്കൂട്ടങ്ങൾ ചേർന്നുണ്ടായി എന്ന് കരുതുന്ന ഇല്ലിക്കൽ കല്ല് മീനച്ചിലാറിന്റെ തുടക്ക സ്ഥാനമായ ഈരാറ്റുപേട്ടയ്ക്ക്‌ അടുത്താണ് സ്ഥിതി ചെയ്യുന്നത്. മൂന്ന് പാറക്കൂട്ടങ്ങളിലെ ഏറ്റവും ഉയരം കൂടിയ പാറ കുടക്കല്ല് എന്നും, തൊട്ടടുത്തു സർപ്പാകൃതിയിൽ കാണപ്പെടുന്ന പാറ കൂനൻ കല്ല് എന്നുമാണ് അറിയപ്പെടുന്നത്. ഈ രണ്ട് കല്ലുകൾക്കിടയിലായി ഇരുപത് അടിയോളം താഴ്ചയിൽ വലിയൊരു വിടവുണ്ട്. ഇവിടെ അരയടി മാത്രം വീതിയുള്ള ഒരു കല്ലുണ്ട്. നരകപാലം എന്ന് ഇത് അറിയപ്പെടുന്നു. നിരവധി അരുവികളും ഇവിടെയുണ്ട്.