റംസാൻ കിറ്റ് വിതരണം: മന്ത്രി കെ ടി ജലീൽ ഈ മാസം തന്നെ വിശദീകരണം നൽകണമെന്ന് ലോകായുക്ത

വിദേശ രാജ്യത്ത് നിന്ന് സഹായങ്ങൾ സ്വീകരിക്കുമ്പോൾ പാലിക്കേണ്ട നടപടിക്രമങ്ങൾ ജലീൽ ലംഘിച്ചുവെന്നാണ് പരാതി. സ്വന്തം മണ്ഡലത്തിലെ ഇഷ്ടക്കാർക്ക് കിറ്റുകൾ വിതരണം ചെയ്തത് സ്വജനപക്ഷപാദമാണെന്നും ലോകായുക്തക്ക് നൽകിയ പരാതിയിലുണ്ട്. ഇത് സത്യപ്രതിജ്ഞാ ലംഘനമാണെന്നും എതിർഭാഗം ചൂണ്ടിക്കാട്ടി. ലോകായുക്ത ജസ്റ്റിസ് സിറിയക് ജോസഫ്, ഉപ ലോകായുക്ത ജസ്റ്റിസ് എ കെ ബഷീർ എന്നിവരുടെതാണ് ഉത്തരവ്.

നയതന്ത്ര പാഴ്സൽ വരുമ്പോഴുള്ള നടപടിക്രമങ്ങളുടെ രേഖ എൻ ഐ എയും  ആവശ്യപ്പെട്ടിരുന്നു. കഴിഞ്ഞ 2 വർഷമായി പ്രോട്ടോക്കോൾ അനുമതിയോടെ എത്തിയ പാഴ്സലുകളുടെ വിവരവും അനുമതി ലഭിക്കാതെ എത്തിച്ച പാഴ്സലുകളുടെ വിവരവുമാണ് എൻ ഐ എ അന്വേഷിക്കുന്നത്.

മന്ത്രി കെ.ടി ജലീൽ മതഗ്രന്ഥത്തിന്റെ മറവിൽ സ്വർണം കടത്തിയെന്ന് ബിജെപി സംസ്ഥാന അധ്യക്ഷൻ കെ.സുരേന്ദ്രൻ ആരോപിച്ചിരുന്നു. വാട്സാപ് സന്ദേശത്തിന്റെ അടിസ്ഥാനത്തിൽ സഹായം സ്വീകരിച്ചുവെന്ന ജലീലിന്റെ വിശദീകരണം തൃപ്തികരമല്ലെന്നാണ് ബി ജെ പി യുടെ വാദം.