'മവാസോ 2025' യൂത്ത് സ്റ്റാർട്ടപ്പ് ഫെസ്റ്റിവലുമായി DYFI; യൂത്ത് സ്റ്റാർട്ടപ്പ് ഐക്കൺ അവാർഡിനായി അപേക്ഷിക്കാം

ഫോർട്ട്‌ കൊച്ചിയിൽ ഡിവൈഎഫ്ഐ സംഘടിപ്പിച്ച യുവധാര യൂത്ത്‌ ലിറ്ററേച്ചർ ഫെസ്റ്റിവൽ ശ്രദ്ധ നേടിയിരുന്നു. ഇതിനു പിന്നാലെ ആണ് ‘മവാസോ 2025’ എന്ന പേരിൽ സ്റ്റാർട്ടപ്പ് ഫെസ്റ്റിവിലിന് തുടക്കം കുറിക്കുന്നത്. ആഫ്രിക്കൻ ഭാഷയായ സ്വാഹിലിയിൽ നിന്നെടുത്ത 'മവാസോ' എന്ന വാക്കിനർത്ഥം "ആശയങ്ങൾ" എന്നാണ്.

വിവിധ വകുപ്പ് മന്ത്രിമാർ, സ്റ്റാർട്ടപ്പ് മിഷൻ സിഇഒ അനൂപ് അംബിക, മുൻ ധനകാര്യമന്ത്രി ഡോ. തോമസ് ഐസക്, വികെസി ഗ്രൂപ്പ് സ്ഥാപകൻ വി കെ സി‌ മമ്മദ് കോയ, കേരളത്തിൽ നിന്നുള്ള പ്രമുഖ സ്റ്റാർട്ടപ്പുകളുടെ സ്ഥാപകരായ ജോയ് സെബാസ്റ്റ്യൻ, റമീസ് അലി, വിമൽ ഗോവിന്ദ്, ദേവിക ചന്ദ്രശേഖരൻ, സജീഷ് കെ‌ വി, അഫ്സൽ സാലു, ജിസ് ജോർജ്, രജിത് രാമചന്ദ്രൻ തുടങ്ങി നിരവധിപ്പേർ പരിപാടിയിൽ അതിഥികളായെത്തും.

കേരളത്തിലെ യുവാക്കളുടെ ആശയങ്ങളെ യാഥാർത്ഥ്യമാക്കി ലോകനിലവാരത്തിലേക്കുള്ള ഉൽപ്പന്നങ്ങളിലേക്കും സേവനങ്ങളിലേക്കും യുവജനങ്ങളുടെ മനസ്‌ പാകപ്പെടുത്തി അവർക്ക് പുതിയ അവസരങ്ങൾ ഒരുക്കുകയാണ്‌ ഈ ഫെസ്റ്റിവലിലൂടെ ലക്ഷ്യമിടുന്നതെന്ന് ഡിവൈഎഫ്ഐ പറയുന്നു.‌

പിച്ചിങ് മത്സരങ്ങൾ, സ്റ്റാർട്ടപ്പുമായി ബന്ധപ്പെട്ട വർക് ഷോപ്പുകൾ, വിദഗ്ധരുടെ സംഭാഷണങ്ങളും പാനൽ ചർച്ചകളും, വിവിധ സ്റ്റാർട്ടപ്പ് ഉല്പന്നങ്ങളെയും/ സേവനങ്ങളേയും പരിചയപ്പെടുത്തുന്ന എക്സിബിഷൻ ബൂത്തുകൾ എന്നിവ രണ്ടു ദിവസമായി നടക്കുന്ന ഫെസ്റ്റിവലിന്റെ ഭാഗമായി ഉണ്ടാകും. പിച്ചിങ് മത്സരത്തിൽ തിരഞ്ഞെടുക്കപ്പെടുന്ന ആദ്യ അഞ്ചു ടീമുകൾക്ക്‌ അര ലക്ഷം രൂപ വീതം സമ്മാനം ലഭിക്കും. ‌ഫെസ്റ്റിവലിൽ പങ്കെടുക്കാൻ വെബ്സൈറ്റ് വഴി രജിസ്റ്റർ ചെയ്യേണ്ടതാണ്. രജിസ്ട്രേഷൻ അവസാന തീയതി ഫെബ്രുവരി 15 ആണ്.

ഫെസ്റ്റിവലിന്റെ ഭാഗമായി യൂത്ത് സ്റ്റാർട്ടപ്പ് ഐക്കൺ അവാർഡും ഏർപ്പെടുത്തിയിട്ടുണ്ട്. 2015 ന് ശേഷം സ്ഥാപിച്ച 45 വയസിനു താഴെയുള്ള സ്റ്റാർട്ടപ്പ് ഉടമകൾക്ക് നേരിട്ടോ സുഹൃത്തുക്കൾക്ക് അവർഡിനായി വെബ്സൈറ്റ് വഴി നോമിനേഷൻ സമർപ്പിക്കാം.

യൂത്ത് സ്റ്റാർട്ടപ്പ് ഫെസ്റ്റിവിലിന്റെ പ്രചരണാർത്ഥം കേരളത്തിലെ വിവിധ കോളേജുകളിൽ സംരംഭക മേഖലയെ സംബന്ധിച്ച് വിദ്യാർത്ഥികളുടെ വ്യത്യസ്തങ്ങളായ ആശയങ്ങളും അഭിപ്രായങ്ങളും കേൾക്കാനും സംശയങ്ങൾക്ക് മറുപടി നൽകാനും ഈ രംഗത്തെ വിദഗ്ധരെ പങ്കെടുപ്പിച്ചു കൊണ്ട് വിവിധ സെമിനാറുകൾക്കും വർക്ഷോപ്പുകൾക്കും ഇതിനോടകം തുടക്കം കുറിച്ചു കഴിഞ്ഞിട്ടുണ്ട്.

മാർച്ച് 1,2 തീയതികളിൽ തിരുവനന്തപുരത്ത് നടക്കുന്ന മവാസോ ഫെസ്റ്റിവലിൽ ഏത് പ്രായത്തിലുള്ളവർക്കും പ്രതിനിധിയായി പങ്കെടുക്കാം. മവാസോയുടെ വെബ്സൈറ്റ് വഴി 100 രൂപ അടച്ച് രജിസ്റ്റർ ചെയ്ത് ഫെസ്റ്റിവിലിന്റെ ഭാഗമാകാം. സ്റ്റാർട്ടപ്പ് സ്ഥാപകർ, വിദ്യാർഥികൾ, സംരംഭക മോഹികൾ, അക്കാദമിക് രംഗത്തെ വിദഗ്‌ധർ തുടങ്ങിയവർ ഫെസ്റ്റിവലിൽ പങ്കെടുക്കും.

രജിസ്റ്ററേഷനും മറ്റു വിവരങ്ങൾക്കും മവാസോയുടെ വെബ്സൈറ്റ് www.mawazokerala.com സന്ദർശിക്കാവുന്നതാണ്.