'ഓപ്പറേഷൻ സുഭാഷ്’ ദൗത്യം വിജയം; കൊച്ചി മെട്രോ പില്ലറിൽ കുടുങ്ങിയ പൂച്ചയെ രക്ഷിച്ചു

കൊച്ചി: മെട്രോ പില്ലറിന് മുകളിൽ കുടുങ്ങിക്കിടന്ന പൂച്ചയെ രക്ഷിച്ചു. കലൂർ ജവാഹർലാൽ നെഹ്‌റു സ്റ്റേഡിയം മെട്രോ സ്റ്റേഷന് സമീപത്തെ 556-ാം നമ്പർ പില്ലറിലായിരുന്നു 'സുഭാഷ്' എന്ന് ഓട്ടോക്കാർ പേരിട്ട പൂച്ച കുടുങ്ങിയത്. ഞായറാഴ്ച പുലർച്ചെ 1.30-ഓടെ ഗാന്ധിനഗർ അഗ്നിരക്ഷാസേനയും ആനിമൽ റെസ്‌ക്യൂ ടീമും ചേർന്നാണ് പൂച്ചയെ സുരക്ഷിതമായി താഴെയിറക്കിയത്. പൂച്ചയെ രക്ഷിച്ച് താഴേക്കിറക്കിയതോടെ ജനക്കൂട്ടം കൂവിയും കൈകളടിച്ചും സന്തോഷം പങ്കിട്ടു. രക്ഷാപ്രവർത്തനത്തിനിടയിൽ ബാനർജി റോഡിൽ വാഹനഗതാഗതകുരുക്കും അനുഭവപ്പെട്ടു. ജനങ്ങൾ തന്നെ മുൻകൈയെടുത്താണ് ഗതാഗതവും നിയന്ത്രിച്ചത്.