'വോട്ടിങ് മെഷീനിൽ കൃത്രിമം എന്ന പ്രചാരണത്തിന് പിന്നിൽ RSS'; പ്രതിപക്ഷത്തെ ആ കെണിയിൽ വീഴ്ത്തിയെന്ന് പി കെ ഫിറോസ്

മലപ്പുറം : ഇലക്ട്രോണിക് വോട്ടിങ് യന്ത്രത്തിൽ കൃത്രിമം നടന്നുവെന്ന പ്രചാരണത്തിന് പിന്നിൽ ആർഎസ്എസ് ആണെന്നാരോപിച്ച് മുസ്ലിം യൂത്ത് ലീഗ് ജനറൽ സെക്രട്ടറി പി കെ ഫിറോസ്. ഫേസ്ബുക്കിലിട്ട പോസ്റ്റിലാണ് ഫിറോസ് ആരോപണം ഉയർത്തിയത്. ഇങ്ങനെയൊരു പ്രചാരണത്തിലൂടെ ബിജെപിക്ക് വോട്ട് നേടിക്കൊടുക്കുകയാണ് ആർഎസ്എസിന്റെ ഉദ്ദേശ്യമെന്നും പ്രതിപക്ഷത്തെ ആ കെണിയിൽ വീണുവെന്നും പി കെ. ഫിറോസ് പോസ്റ്റിൽ പറയുന്നു. ലോക്സഭാ തിരഞ്ഞെടുപ്പിൽ ബിജെപി വൻ വിജയം നേടിയപ്പോൾ ഇവിഎമ്മിൽ കൃത്രിമം കാട്ടി എന്ന ആരോപണവുമായി ചിലർ രംഗത്ത് വന്നിട്ടുണ്ടെന്നും ഇങ്ങനെ പറയുമ്പോൾ അതിലൂടെ ഗുണം നേടുന്നത് ബിജെ.പി ആണെന്നും ഫിറോസ് പറയുന്നു. ഇങ്ങനെ ഒരു ആരോപണത്തിന് പ്രചാരണം കിട്ടുമ്പോൾ ബിജെപി ഭരണത്തിൽ മനം മടുത്ത വോട്ടർമാർ വോട്ട് ചെയ്യാൻ മിനക്കെടില്ലെന്നും അതുവഴി ബിജെപി അനുകൂലരുടെ വോട്ടുകൾ മാത്രമായി നേടാൻ ബിജെപിക്ക് കഴിയുമെന്നും അദ്ദേഹം പോസ്റ്റിൽ പറയുന്നു. നമ്മൾ ഇന്ത്യയെ വീണ്ടെടുക്കും എന്ന ഹാഷ്ടാഗോട് കൂടിയാണ് പി കെ ഫിറോസിന്റെ പോസ്റ്റ് അവസാനിക്കുന്നത്.