Kerala Elephant Death | ഗർഭിണിയായ ആനയുടെ കൊലപാതകം: വ്യാജ പ്രചാരണം അവസാനിപ്പിക്കണമെന്ന് പി.കെ കുഞ്ഞാലിക്കുട്ടി എം.പി

എന്നാൽ സംഭവം നടന്നത് മലപ്പുറം ജില്ലയിലാണെന്ന തരത്തിലുള്ള പ്രചാരണം കേന്ദ്രമന്ത്രി പ്രകേശ് ജാവദേക്കർ, മനേക ഗാന്ധി തുടങ്ങിയവർ ഉൾപ്പടെ നടത്തുന്നത് അപലപനീയമാണെന്ന് പി.കെ കുഞ്ഞാലിക്കുട്ടി ഫേസ്ബുക്ക് വീഡിയോയിൽ പറഞ്ഞു. സംഭവം നടന്നത് പാലക്കാട് ജില്ലയിലെ മണ്ണാർക്കാട് ഫോറസ്റ്റ് ഡിവിഷനിൽ ഉൾപ്പെട്ട സ്ഥലത്താണെന്നും അദ്ദേഹം ചൂണ്ടിക്കാട്ടി.

ആനയെ കൊലപ്പെടുത്തിയ നടപടി മനുഷ്യന് ചേർന്നതല്ലെന്ന് കുഞ്ഞാലിക്കുട്ടി പറഞ്ഞു. ഈ കോവിഡ് കാലത്ത് മനുഷ്യർ കൂടുതൽ സഹജീവി സ്നേഹത്തോടെ കഴിയുമ്പോഴാണ് നാടിനുതന്നെ ചീത്തപ്പേര് ഉണ്ടാക്കുന്ന ഇത്തരം കാര്യങ്ങൾ ഉണ്ടാകുന്നത് ശരിക്കും അത്ഭുതകരമാണ്. ഈ സംഭവത്തെ ശക്തമായി അപലപിക്കുന്നു. അവർക്കെതിരെ കർശനമായ നടപടി വേണമെന്നും കുഞ്ഞാലിക്കുട്ടി പറഞ്ഞു.

മലപ്പുറമായാലും പാലക്കാടായാലും ഒരിക്കലും സംഭവിക്കാൻ പാടില്ലാത്ത കാര്യമാണ് നടന്നത്. ഇവിടെ ശ്രദ്ധിക്കേണ്ടത് ഇത്തരമൊരു സംഭവം നടന്നതിലാണ്. അതിനെതിരെയാണ് ആളുകൾ പ്രതികരിക്കേണ്ടത്. ആനയ്ക്കെതിരായ ക്യാംപയ്ൻ ചെയ്യുന്നതുവഴി വർഗീയപ്രചാരണം നടത്തുന്നവരെയും തിരിച്ചറിയേണ്ടതുണ്ട്. ആനയെ കൊന്ന സംഭവത്തിൽ പ്രചാരണം നടത്തുന്നതിനൊപ്പംതന്നെ വർഗീയത പരത്തുന്നവർക്കെതിരെയും ബുദ്ധിജീവികൾ ഉൾപ്പടെയുള്ളവർ രംഗത്തെത്തണമെന്ന് പി.കെ കുഞ്ഞാലിക്കുട്ടി ആവശ്യപ്പെട്ടു.