'അനീതിയുടെ ഒളിയമ്പുകളാണെയ്യുന്നതെങ്കിൽ പൊരുതിയേ വീഴൂ'; കമ്മീഷണറെ വിമർശിച്ചതിന് സസ്പെൻഷനിലായ പൊലീസ് ഓഫീസറുടെ പോസ്റ്റ്

കൂടെ നിന്നവര്‍ക്ക് സ്‌നേഹവും കടപ്പാടും അറിയിച്ച് സസ്പെൻഷനിലായ പൊലീസ് ഓഫീസറുടെ ഫേസ്ബുക്ക് പോസ്റ്റ്. ശബരിമല കർമസമിതി ആഹ്വാനം ചെയ്ത ഹർത്താലിനിടെ മിഠായിതെരുവിലുണ്ടായ ആക്രമണങ്ങളുടെ പശ്ചാത്തലത്തിൽ കോഴിക്കോട്ട് സിറ്റി പൊലീസ് കമ്മീഷണർക്കെതിരെ ഫേസ്ബുക്ക് പോസ്റ്റിട്ടതിന് സസ്പെൻഷനിലായ ക്രൈംബ്രാഞ്ച് ഉദ്യോഗസ്ഥൻ ഉമേഷ് വള്ളിക്കുന്നാണ് എല്ലാവർക്കും നന്ദി പറഞ്ഞ് രംഗത്തെത്തിയത്. ജനതയെ ഒറ്റുന്നവനോടൊപ്പമല്ലെന്നും മനുഷ്യപക്ഷത്ത് തന്നെയാണ് അടിയുറച്ചു നിൽക്കേണ്ടതെന്ന് ആവർത്തിച്ചുറപ്പിക്കാനുള്ള ഊർജ്ജമാണ് പകർന്നു കിട്ടിയതെന്ന് അദ്ദേഹം ഫേസ്ബുക്ക് പോസ്റ്റിൽ പറയുന്നു. നിയമവും നീതിയും നടപ്പാക്കാനുള്ള ഏത് നടപടികളും അംഗീകരിച്ച് ഒപ്പം നിൽക്കും. അനീതിയുടെ ഒളിയമ്പുകളാണെയ്യുന്നതെങ്കിൽ പൊരുതിയേ വീഴൂവെന്നും ഉമേഷ് വള്ളിക്കുന്ന് പറയുന്നു.