സ്വർണ്ണപ്രഭയിൽ കൊടിമരവും നവീകരിച്ച ചുറ്റമ്പലവും; ആറാട്ട് മഹോത്സവത്തിനൊരുങ്ങി തുറുവിള ധർമ്മശാസ്താ ക്ഷേത്രം

2026 ജനുവരി 14 മുതൽ 25 വരെ ക്ഷേത്ര തന്ത്രി കൊല്ലൂർ അത്തിയറമഠം ബ്രഹ്മശ്രീ കൃഷ്ണപ്രശാന്ത് നീലകണ്ഠരുടെ മുഖ്യകാർമ്മികത്വത്തിൽ വിപുലമായ രീതിയിൽ കൊടിയേറ്റ് ഉത്സവം നടത്തുകയുണ്ടായി. കലിയുഗവരദനായ അയ്യപ്പൻ്റെ പൂർണ്ണരൂപമായ വനശാസ്‌താവാണ് ഇവിടെ പ്രധാന പ്രതിഷ്ഠ. ഗണപതി, നാഗദൈവങ്ങൾ എന്നിവരാണ് ഉപദേവതകൾ. ക്ഷേത്രത്തിന് മുന്നിലായുള്ള വിശാലമായ തീർത്ഥസരസ്സ് ഈ പ്രദേശത്തെ തന്നെ അപൂർവ്വമായ കാഴ്ചയാണ്. സന്ധ്യാസമയത്തെ ദീപാരാധനയും മണിനാദവും തീർത്ഥക്കരയിലെ കുഞ്ഞോളങ്ങളും ഭക്തർക്ക് മനോഹരമായ ഒരു അനുഭൂതി പകർന്നുനൽകുന്നു. 2013-ൽ നടത്തിയ ദേവപ്രശ്ന വിധി പ്രകാരം ക്ഷേത്രത്തിൻ്റെ പുരോഗതി നാടിൻ്റെ ഐശ്വര്യത്തിന് അത്യാവശ്യമാണെന്ന് കണ്ടിരുന്നു.

ഇതനുസരിച്ച് നടന്ന പുനരുദ്ധാരണ പ്രവർത്തനങ്ങൾ പ്രദേശത്ത് വലിയ മാറ്റങ്ങളാണ് കൊണ്ടുവന്നത്. ഇതിൻ്റെ തുടർച്ചയെന്നോണം ദേവപ്രശ്ന വിധിയിലെ ബാക്കി കാര്യങ്ങൾ കൂടി നടപ്പിലാക്കാനുള്ള ഒരുക്കത്തിലാണ് നാട്ടുകാർ. അരവണ പൊങ്കാലയോടുകൂടി ഭഗവാൻ്റെ തീർത്ഥസരസ്സിൽ ആറാട്ട് നടത്തുന്നതിനുള്ള പ്രാരംഭ പ്രവർത്തനങ്ങൾ ക്ഷേത്ര ഉപദേശക സമിതിയുടെ നേതൃത്വത്തിൽ ഇപ്പോൾ നടന്നുവരുന്നു. മണ്ഡലകാലവും മകരവിളക്കുമാണ് ക്ഷേത്രത്തിലെ പ്രധാന ഉത്സവകാലങ്ങൾ.