'ഇനിയൊരു മയിൽപ്പീലിയായി തൃശൂരിന്‍റെ ഹൃദയത്തിലെ പുസ്തകത്താളിൽ' ടി.എന്‍ പ്രതാപന്‍

സ്ഥാനാര്‍ഥി മാറ്റത്തെ കുറിച്ചുള്ള മാധ്യമങ്ങളുടെ ചോദ്യത്തോട് ടി.എന്‍ പ്രതാപന്‍റെ മറുപടി ഇങ്ങനെ. 'ടി.എന്‍ പ്രതാപന്‍ എന്ന പേര്  തൃശൂരിന്‍റെ ഹൃദയത്തിലെ വര്‍ണം വറ്റാത്ത പുസ്തകത്താളിൽ ഇനിയൊരു മയില്‍പ്പീലിയായി ഉണ്ടാകും'.

സുരേഷ് ഗോപിയുടെ സ്ഥാനാര്‍ഥിത്വം കൊണ്ട് താരമണ്ഡലമായ തൃശൂരില്‍  സിറ്റിങ് എംപിയായ ടി.എന്‍ പ്രതാപന്‍ വീണ്ടും മത്സരിക്കുമെന്നായിരുന്നു റിപ്പോര്‍ട്ടുകള്‍. പ്രതാപന്‍ തൃശൂരില്‍ പ്രചാരണത്തിനിറങ്ങുകയും ചെയ്തിരുന്നു. 150 ഓളം സ്ഥലങ്ങളില്‍ പ്രതാപന് വേണ്ടി ചുവരെഴുത്തുകള്‍ നടത്തുകയും മൂന്നരലക്ഷത്തോളം പോസ്റ്ററുകള്‍ ഇറക്കുകയും ചെയ്തിരുന്നു. ഇതിന് പിന്നാലെയാണ് കഴിഞ്ഞ ദിവസം ചേര്‍ന്ന കോണ്‍ഗ്രസ് സെന്‍ട്രല്‍ തെരഞ്ഞെടുപ്പ് കമ്മിറ്റിയില്‍ നാടകീയ തീരുമാനം ഉണ്ടായിരിക്കുന്നത്. പ്രതാപന് വേണ്ടിയുള്ള ചുവരെഴുത്തുകള്‍ മായ്ക്കാന്‍ തൃശ്ശൂര്‍ ഡിസിസി പ്രവര്‍ത്തകര്‍ക്ക് നിര്‍ദേശം നല്‍കിയിട്ടുണ്ട്.

പ്രതാപനെ നിയമസഭയിലേക്ക് പരിഗണിക്കാമെന്ന് കോണ്‍ഗ്രസ് ഹൈക്കമാന്‍ഡ് ഉറപ്പ് നല്‍കിയതായാണ് വിവരം. സ്ഥാനാർത്ഥി നിര്‍ണയത്തിന് മുന്‍പായി കോണ്‍ഗ്രസ് നേതൃത്വം തന്നോട് ആശയവിനിമയം നടത്തിയിരുന്നതായി പ്രതാപന്‍ പറഞ്ഞു.