മഴ കനത്തതോടെ തിമിർത്തുല്ലസിച്ച് പാലൊഴുകുംപാറ; പച്ചപുതച്ച് കൂടുതൽ സുന്ദരിയായി വാഗമൺ

പച്ചപ്പിൽ രണ്ട് മലകൾക്ക് നടുവിലൂടെ അവയെ പിളർന്ന് വെള്ള കീറിയൊഴുകുന്ന പാലൊഴുകും പാറ. പേര് അന്വർഥമാക്കുന്ന ഒരു വെള്ളച്ചാട്ടം. മലമുകളിൽ നിന്നാരോ പാറക്കെട്ടിലൂടെ പാലൊഴുക്കി വിട്ടതോ എന്ന് തോന്നിപ്പോകും വിധം പതഞ്ഞൊഴുകി വെള്ളം താഴേക്ക് പതിക്കുന്നു.

വെള്ളച്ചാട്ടത്തിൻ്റെ വിദൂര കാഴ്ച്ചകളാണ് കൂടുതൽ ആകർഷകം. ചില സമയങ്ങളിൽ, പ്രത്യേകിച്ച് മഴക്കാലത്ത് കോടമഞ്ഞ് മൂടിയ പാലൊഴുകും പാറ അതി മനോഹരിയാണ്. കനത്ത കാറ്റിൻ്റെ അകമ്പടിയിൽ എത്തുന്ന പാലൊഴുകും പാറയിലെ മഴക്കാഴ്ച്ചകൾ കണ്ണിനും മനസ്സിനും രസം പകരും. അധികം സഞ്ചാരികൾ എത്താത്ത പ്രദേശമാണിവിടം. പച്ചപ്പ് നിറഞ്ഞ ചുറ്റുപാടുകളും ഇടതൂർന്ന സസ്യജാലങ്ങളടങ്ങിയ പ്രകൃതിയുമാണ് പാലൊഴുകുംപാറ വെള്ളച്ചാട്ടത്തിന്റെ മറ്റൊരു പ്രത്യേകത. മഴക്കാലത്ത് ജലസമൃദ്ധമാകുന്ന ഈ വെള്ളച്ചാട്ടം മലമുകളിലെ ഒരു കൊച്ചു തടാകത്തിൽ നിന്നാണ് ആരംഭിക്കുന്നത്.

കേരളത്തിലെ തന്നെ ഏറ്റവും ഉയരം കൂടിയ വെള്ളച്ചാട്ടങ്ങളിൽ ഒന്നുകൂടിയാണിത്. വാഗമണ്ണിൽ നിന്നും 10 കിലോമീറ്റർ മാറിയാണ് പാലൊഴുകും പാറവെള്ളച്ചാട്ടം സ്ഥിതി ചെയ്യുന്നത്. വാഗമണ്ണിൽ നിന്നും ഏകദ്ദേശം അര മണിക്കൂർ യാത്രയുണ്ട് ഇവിടേയ്ക്ക്. അപകടം പതിയിരിക്കുന്ന വെള്ളച്ചാട്ടത്തിന്റെ അടുത്തെത്താൻ വഴികളില്ല. മുന്നറിയിപ്പ് അവഗണിച്ച് വെള്ളച്ചാട്ടത്തിൽ ഇറങ്ങിയവർക്ക് ജീവൻ നഷ്ടമായ കഥയും പാലൊഴുകുംപാറയ്ക്ക് പറയാനുണ്ട്.