നാലാമത്തെ അന്താരാഷ്ട്ര വിമാനത്താവളം

നമ്മുടെ അയല്‍ക്കാരായ തമിഴ്‌നാടിനായിരുന്നു രാജ്യത്ത് ഏറ്റവും കൂടുതല്‍ അന്താരാഷ്ട്ര വിമാനത്താവളമുള്ള സംസ്ഥാനം എന്ന ഖ്യാതിയുണ്ടായിരുന്നത്. നാല് അന്താരാഷട്ര വിമാനത്താവളങ്ങളാണ് തമിഴ്‌നാട്ടിലുള്ളത്. ചെന്നൈ ഇന്റര്‍നാഷണല്‍ എയര്‍പോര്‍ട്ട്, കോയമ്പത്തൂര്‍ ഇന്റര്‍നാഷണല്‍ എയര്‍പോര്‍ട്ട്, മധുരൈ ഇന്റര്‍നാഷണല്‍ എയര്‍പോര്‍ട്ട്, തിരുച്ചിറപ്പള്ളി ഇന്റര്‍നാഷണല്‍ എയര്‍പോര്‍ട്ട് എന്നീ അന്താരാഷ്ട്ര വിമാനത്താവളങ്ങളാണ് തമിഴ്‌നാട്ടിലുള്ളത്.

ചത്രപതി ശിവജി ഇന്റര്‍നാഷണല്‍ എയര്‍പോര്‍ട്ട് മുംബൈ, പൂനെ ഇന്റര്‍നാഷണല്‍ എയര്‍പോര്‍ട്ട് പൂനെ, ബാബാസാഹേബ് അംബേദ്കര്‍ ഇന്റര്‍നാഷണല്‍ എയര്‍പോര്‍ട്ട് നാഗ്പൂര്‍ എന്നിവയാണ് മഹാരാഷ്ട്രയിലെ മൂന്ന് ഇന്റര്‍നാഷണല്‍ എയര്‍പോര്‍ട്ടുകള്‍.

എന്നാല്‍ ജനസംഖ്യയുടെ കാര്യത്തിലും വലിപ്പത്തിലും ഈ രണ്ട് സംസ്ഥാനങ്ങളേക്കാള്‍ വളരെ പിന്നില്‍ നില്‍ക്കുന്ന കേരളത്തില്‍ നാല് അന്താരാഷ്ട്ര വിമാനത്താവളങ്ങളുണ്ട് എന്നത് കേരളത്തിന്റെ പ്രത്യേകതയാണ്. 2012 ലെ കണക്കുകള്‍ പ്രകാരം കേരളത്തില്‍ 3.48 കോടി ജനതയാണുള്ളതെങ്കില്‍ തമിഴ്‌നാട്ടിലെ ജനസംഖ്യ 6.79 കോടിയാണ്. മഹാരാഷ്ട്രയിലത് 11.42 കോടിയും. വലിപ്പത്തിന്റെ കാര്യത്തിലും ഈ രണ്ട് സംസ്ഥാനങ്ങളുടെയും പകുതി മാത്രമെ കേരളം വരുന്നുള്ളു.

തമിഴ്‌നാട്ടില്‍ നാല് അന്താരാഷ്ട്ര വിമാനത്താവളങ്ങളുണ്ടെങ്കിലും എല്ലാ എയര്‍പോര്‍ട്ടുകളില്‍ നിന്നും ഒരുപോലെ അന്താരാഷ്ട്ര സര്‍വ്വീസുകളില്ല എന്നതാണ് മറ്റൊരു സവിശേഷത. ഇതിനു സമാനമാണ് മഹാരാഷ്ട്രയിലെയും സ്ഥിതി. പ്രധാനപ്പെട്ട രണ്ട് അന്താരാഷ്ട്ര വിമാനത്താവളങ്ങളില്‍ നിന്നുമാത്രമെ ഇവിടങ്ങളില്‍ നിന്ന് കൂടുതല്‍ സര്‍വ്വീസുകളുള്ളു. എന്നാല്‍ കേരളത്തിലെ മൂന്ന് അന്താരാഷ്ട്ര വിമാനത്താവളങ്ങളില്‍ നിന്നും കൂടുതല്‍ അന്താരാഷ്ട്ര സര്‍വ്വീസുകളുണ്ട്. കണ്ണൂരും ആ നിരയിലേക്ക് എത്തിച്ചേരുമെന്ന കാര്യത്തില്‍ സംശയവുമില്ല.